DILI, STLTIMORLESTE.com – Timor Leste (TL) selebra tinan 50 loron proklamasaun unilateral independensia iha 28 Novembru, Prezidente Republika, Jose Ramos Horta konvida eis Prezidente Republika, Francisco Guterres Lu Olo, Eis Prezidente Republika Taur Matan Ruak, nomos Eis Primeiru Ministru, Marí Bim Amude Alkatiri hanesan konvidadu hodi mai partisipa serimonia proklamasaun nee.
Liafuan nee PR Horta hatoo liu husi nia aprezentasaun iha Palasiu Prezidensial Nicolau Lobato, Bairo Pite, Kuarta (26/11/2025).
Nia dehan, TL nia susesu boot mak nee pas iha rai laran, nee duni doutor Marí Alkatiri, Maun Xanana, Lu Olo, Taur Matan Ruak koalia ka la koalia ida-idak nia hakarak, nee laos problema konflitu.
Prezidente Republika hatete, sira nee hotu kontribui, hotu-hotu laiha ida neebe la kontribui, hanesan Lere, Falur sira hotu-hotu, maibe líder nasional, líder polítiku sira, líder militar mak sira nee.
Nia katak, Maun boot Xanana la marka prezensa iha 28 Novembru, tanba nia promete tiha ona ba iha Oekusse.
“Hau litik Maun boot Xanana, hau hatete maun boot nee tinan 50, ita boot mak numeru ida líder nasional garante independensia hetan nee, loloos ita devia mak dirije festa 28 Novembru nee, laos hau,” PR hatete.
Maibe, nia (Xanana) hatete, lae, nia promete tiha ona, nia lakohi demora, nia aranka tiha ona ohin dader, mais halo iha Oekusse tanba espesial, nia ba iha Oekusse.
“Hatudu nia konfia, nia entrega nia hatete Prezidente Republika mak dirije, hau hatete nee loos duni, tuir protokolu Prezidente Republika, mais Xanana líder nasional numeru ida, hau Prezidente Republika lae, hau respeita nia ema neebe dada ita too iha nee,” nia konklui.
Iha biban nee nia mos husu jerasaun foun nafatin respeita no hakruuk ba heroi sira neebe ho esforsu brani hodi lori rai nee ba hetan ukun rasik aan no iha 28 novembru komemora Timor Leste nia proklamasaun unilateral ba dala 50.
Jornalista: Emerenciana Pinto
Editora : Domingas Gomes
