OEKUSI, STLTIMORLESTE.com – Komemorasaun loron proklamasaun unilateral independensia ba dala 49, Prezidente Republika (PR), Jose Ramos Horta husu sidadaun hotu proteje dame iha futuru.
Prezidente Republika Jose Ramos Horta hatoo lia hirak nee liu husi diskursu, iha selebrasaun loron Proklamasaun Independensia ba dala 49 iha Kampu 1 Maiu RAEOA, Kinta (28/11/2024).
Nia hatete, agradese ba eroi sira nia luta neebe lori rai nee bele hetan ukun rasik aan, iha biban nee nia husu povu tomak kontinua proteje dame.
“Memoria husi kombateiru sira nee kontinua enkoraja ita atu proteje dame no independensia, nunee mos atu luta ba futuru ida neebe justu no inkluzivu liu, liu-liu ba sira neebe presiza liu: labarik, feto, ferik-katuas no ema ho defisiensia sira,” katak PR Horta.
Iha biban nee, Prezidente Republika hatoo agradese ba konvidadu oin-oin, nasional no internasional neebe hamutuk ho povu Timor Leste hodi selebra loron momentu signifikativu nee, prezensa reflete amizade, respeitu no kooperasaun ba malu neebe marka ona, porezemplu relasaun entre nasaun.
Nia hatutan, konflitu neebe hamosu Timor Leste ho funu sivíl nia eskluzaun iha fulan Agostu 1975, neebe kauza husi radikalizasaun ideolojika, kria divizaun klean sira neebe marka istoria. Ida nee halo irmaõ-irmã sira lakon sira nia moris no sira hetan kanek neebe boot.
Tuir observasaun STL iha selebrasaun komemorasaun loron proklamasaun Independensia ba dala 49 halao iha RAEOA, marka prezensa masimu husi Membru Governu, membru Parlamentu Nasional, Korpu Diplomatiku, inklui konvidados espesial nasaun Vizinhu Indonezia no nasaun seluk inklui mos povu RAEOA.
Prezidente Repúblika, Jose Ramos Horta ho nia delegasaun too iha Aeroportu Internasionál Oekusi simu ho kultura rai RAEOA tara tais, simu ho lia dadolin no inklui dansa kultura husi labarik sira.
Hafoin remata ida nee, Prezidente kontinuasaun viajen ba iha fatin deskansa iha minutu balun, no kontinua Pprezide serimónia 28 Novembru.
Enkuantu Xefe Estadu ho nia delegasaun sai husi Aeroportu Internasionál Nicolau Lobato ho aviaun Aero Dili ho oras 07:00, no iha durasaun viajen husi Dili mai Oekusi ho minutu 30.
(eme)
