DILI, STLTIMORLESTE.com – Ministeriu Publiku (MP) iha alegasaun ba krime Arma Branka, solisita ba iha Tribunal Koletivu atu kondena arguidu inisial LMF.
Iha alegasaun nee, Prokuradora Bemvinda do Rozario deklara katak, iha prosesu ida nee arguidu hamutuk nain ualu, maibe arguidu ho inisial LMF mak momentu neeba kaer Rama Ambon.
Tanba nee, Prokuradora husu Tribunal atu kondena arguidu LMF tinan 3 fulan 6 prizaun, ba arguidu nain hitu seluk MP husu Tribunal tetu atu aplika kastigu tuir konviksaun Tribunal nian.
Enkuantu husi parte defeza arguidu sira nian, Fransisco Martins husu Tribunal atu absolve arguidu sira, tanba la prienxe ba elementu krime neebe iha.
Rona tiha alegasaun, Tribunal adia ba loron seluk hodi rona desizaun.
Iha indisus sufisiente katak, arguidu LMF, JG, SAAG, JG, DdDS, DFG, AdSS, IdCS nuudar membru arte Ritual 77.
Iha loron 07 fulan Agostu 2017, oras tuku 03:00 OTL, arguidu sira ho kondisaun lanu, sae motorizada ho kanu resin halai iha estrada publika hodi kontra tranzitu husi Akait ba Bairo Formoza nomos halo barulhu.
Bainhira to iha Palasiu Governu nia oin, arguidu sira hakilar hodi hatudu jestu nomos tolok lezadu DdS, nunee halo lezadu sente tauk.
Kuandu motorizada sira nee fila fali husi Bairo Formosa, arguidu sira balun hodi rama ambon hana ba lezadu no balun hodi fatuk tuda lezadu nian liman kona fatuk, rezulta lezadu nia liman parte karuk hetan moras no metan.
Nunee, komunidade sira sente la hakmatek hodi kontaktu ba polisia mai kaer arguidu sira iha lokal, prende mos rama ambon husi arguidu sira nia liman.
Tanba nee, polisia halo kedas apreensaun ba arguidu sira nian motorizada, hamutuk ho rama ambon. Deskobre katak rama ambon nee pertensia ba arguidu LMF nian.
Motivu husi problema nee tanba arte marsial hodi hamosu intrankuilidade ba publiku.
Arguidu sira komete krime nee ho voluntaria, livre no konsientemente, arguidu sira hatene katak hahalok lori rama ambon no kombina malu halo barulhu no hamosu intranquilidade ba publiku, nudar hahalok neebe lei bandu maibe arguidu sira halo nafatin hodi kontra lei.
Tanba nee konstitui arguidu sira nudar ko-autoria material ba krime Utilizasaun ba arma Branka tuir artigu 20 numeru 2 alinea A no mos artigu 200 n.1 husi Lei N.5/2017, Lei konaba Rejime Juridiku Relativu pratika Arte Marsiais Rituais, Armas Brankas Rama Ambon Kinta Alterasaun Kodigu Penal.
Prosesu nee prezide husi Juiz Koletivu, Ana Paula, Jose Maria, Ersilia de Jesus, Ministeriu Publiku reprezenta husi Prokurador Bemvinda Do Rojario, arguidu hetan asistensia legal husi Defensor Publiku Fransisco Martins.
(ter)
