DILI, STLTIMORLESTE.com – Tribunal Judisial Primeira Instansia Dili (TJPID) liu husi leitura akordaun, kondena arguidu ho inisial VL, tanba komete krime hasoru lezada inisial TYLB.
Iha leitura akordaun nee Tribunal haree katak, arguidu nia aktu prienxe duni ba iha krime Abuzu Seksual ba Menor, neebe previstu iha artigu 177 husi Kodigu Penal Timor Leste nian.
Tribunal Koletivu tetu deklarasaun sira neebe presta perante julgamentu, ikus mai Tribunal Koletivu deside aplika pena prizaun tinan 6 ba arguidu.
Iha leitura akordaun nee Tribunal liu husi Juiz prosesu esplika ba arguidu atu la konkorda ho desizaun Tribunal nian bele liu husi nia defeza, hodi halo rekursu ba iha Tribunal Rekursu (TR) durante prazu loron 30 nia laran.
Iha faktus katak, iha tinan 2022 lezada nia inan no aman la iha uma. Iha momentu neeba mak arguidu halo krime hasoru lezada.
Konsekuensia husi arguidu nia hahalok nee halo lezada sente ladun seguru.
Tanba nee, Ministeriu Publiku (MP) akuza arguidu komete krime Abuzu Seksual ba Menor neebe previstu iha artigu 177 husi Kodigu Penal Timor Leste.
Prosesu nee prezide husi Juiz Koletivu, Jumiati Freitas, Jose Quintao, Juiz estajiadu nain ida, Ministeriu Publiku (MP) reprezenta husi Prokurador nain ida, arguidu hetan asistensia legal husi Advogada Privada, Virna de Carvalho.
(ter)
