DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu nain neen (6), neebe komete krimi Furtu no Danu ho Violensia.
Aktus sufisiente katak, iha loron 22 Marsu 2020, haleu oras tuku 01h30 kalan, lezadu JXC no sira seluk (kuaze ema nain 10 hanesan nee) ho kareta marka 300 fila husi Hera too iha area Taibesi, hetan asaltu husi arguidu NCB ho sira seluk.
Katak arguidu sira taka dalan ho maneira butuk fatuk no satan netik ai iha dalan, lezadu tun husi kareta hodi husu tanba saida mak imi taka dalan, foin koalia hanesan nee arguidu sira hahu tuda lezadu hanesan arguidu NCB hodi fatuk tuda dala ida atinji iha lezada nia tilun kauza kanek no raan sai.
Katak tuir mai arguidu sira tuda estraga lezadu nia kareta hodi fatuk no hodi aidona baku fera vidru kareta parte sorin karuk no parte oin sai kabelak.
Katak lezadu JXC konsege halai sai husi kareta laran, hodi tama ba uma laran.
Arguidu sira duni tuir komu la toman arguidu sira hodi aidona no fatuk baku no tuda estraga nia uma no sasan sira hanesan odamatan ida ho folin US$ 70.00, vidru janela tahan 11 ho nia folin US$ 275.
Arguidu sira tama ba uma laran hodi baku estraga armariu guarda fatu rua ho nia folin US$ 370.00, televizaun 1 marka politron ida ho nia folin US$ 150.00, baku estraga mos motorizada ida matrikula 0658 TL ho nia folin US$ 50.00.
No foti naok osan ho total US$ 5.000.00 neebe rai hela guarda fatu laran, sasan neebe hetan estragus ho total hamutuk US$ 5.915.
Katak arguidu sira NCB no sira seluk tau hamutuk forsa hodi halo aksaun hasoru lezadu sem razaun neebe apuradu.
Konsekuensia husi arguidu sira nia hahalok nee halo lezadu hetan kanek iha tilun hun hetan tratamentu mediku iha Hospital Nasional Guido Valadadres (HNGV), maibe simu deit aimoruk.
Arguidus sira hatene katak, bainhira hodi aidona baku ho makaas no tuda hodi fatuk hasoru odamatan, janela no motorizada sasan sira nee bele hetan estragus.
Arguidu sira hatene katak sira nia hahalok sira deskreve iha faktu ida nee nuudar hahalok krimi neebe lei bandu, maibe kontinua halo.
Nune konstitui arguidu sira NCB, MSR, JAT, RO, MG no AGM hanesan Autores material ho forma konsumada ba krimi Furtu no Danu ho violensia husi artigu 260 Kodiku Penal.
Antes nee arguidu sira hatoo ona deklarasaun iha julgamenru kontinuasaun nee Tribunal rona deklarasaun husi lezadu.
Iha sala julgamentu laran lezadu JXC deklara katak, momentu arguidu mak taka dalan maibe arguidu nain 5 iha no arguidu MSR mak la iha, no lezadu la hetan se mak tuda lezadu maibe ema lori fatuk tuda kona lezadu nia tulun hun parte karuk.
Lezadu deklara tan, momentu arguidu sira hapara kareta arguidu MSR baku hirus matan hodi dehan “Ami la gosta ema firaku” no lezadun tun husi kareta halai ba kantor polisia.
Lezadu JdCG mos deklara katak, momentu neeba lezadu la hetan se mak baku rahun motor.
Rona tiha parte rua tribunal adia ba loron seluk hodi rona sasin.
Audensia nee prezide husi Juiz Jose Maria, Ana Paula, Ersilia de Jesus, Ministeriu Publiku reprezenta husi Prokurador Domingos Bareto, arguidu hetan asistensia legal husi Defensor Publiku nain ida.
(ter)
