DILI, STLTIMORLESTE.com – Tribunal Judisial Primeira Instansia Dili halao julgamentu ba arguida ho inisial ESO, tanba komete krimi hasoru lezada ho inisial EMO.
Krimi refere ho natureza semi publiku, iha sala julgamentu laran arguida la aseita atu dada fila, tanba nee Tribunal kontinua ho julgamentu.
Tuir akuzasaun neebe Juiz prosesu Ivan Suritai lee sai iha loron Segunda nee katak, iha loron 11 fulan Junhu tinan 2024 arguida hateten ba ofendida EMO nia laen dehan, labele mete hau nia moris, tanba nee nia laen hateten ba arguida katak, problema ho hau nia feen ba buka nia.
Arguida ba buka ofendida iha uma hodi tuku odamatan, tanba nee ofendida loke odamatan hodi arguida tama ba kuartu laran, rakut ofendida nia fuuk no kontinua tuku iha liman fuan kiik hetan bubu.
Ofendida sente moras lori nia liman dudu arguida, maibe arguida nafatin lori liman kaer metin ofendida nia fuuk hodi rasta.
Arguida halo agresaun hasoru ofendida, tanba ofendida fo hatene ba iha familia kona-ba ema mane ida mai iha arguida nia uma.
Konsekuensia husi arguida nia hahalok nee, halo ofendida sente moras hodi ba hatoo keixa.
Tanba nee, Ministeriu Publiku akuza arguida komete krime Ofensa Integridade Fizika Simples neebe previstu iha artigu 145 Kodigu Penal.
Hatan ba akuzasaun neebe iha, arguida deklara katak, momentu neeba lezada mak halo uluk agresaun hasoru arguida, tanba nee mak arguidu mos rakut lezada nia fuuk.
Arguida mos konfesa katak, faktus neebe konsta iha akuzasaun loos hotu.
Lezada mos haforsa tan akuzasaun neebe iha katak, arguida halo duni agresaun hasoru lezada, tanba nee mak lezada sente moras hodi ba hatoo keixa.
Rona tiha deklarasaun sira nee, iha alegasaun Prokurador Renato Bere Nahac mantein ho akuzasaun nebee iha, husu Tribunal atu kondena arguida pena prizaun tinan 1, suspende ba tinan 2.
Enkuantu husi parte Defeza Henrique Mariz husu Tribunal atu absolve arguida, tanba arguida konfesa katak, laos arguida deit mak halo agresaun, maibe lezada mak halo uluk agresaun hasoru arguida.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juiz Singular Ivan Suritay, Ministeriu Publiku reprezenta husi Prokurador Renato Bere Nahak, arguidu hetan asistensia legal husi Defensor Publiku Henrique.
(ter)
