DILI, STLTIMORLESTE.com – Tribunal Judisial Primeira Instansia Dili liu husi despaisu ba prosesu primeiru interogatoriu, deside hodi aplika medida Aprezentasaun Periodika (AP) no Termu Identidade Rezidensia (TIR) ba arguidu ho inisial AS, neebe deskonfia komete krimi omisidiu simples.
Iha despaisu loron Kuarta nee (02/07/2025) Juiz prosesu Jose Quintao deside hodi aplika medida AP ba arguidu atu aprezenta an iha eskuadra Polisia Likisa nian semana ida dala ida iha loron Sesta hodi hein prosesu investigasaun. No arguidu lori mai iha Tribunal, Ministeriu Publiku promove ho krimi omisidiu simples.
Tuir defeza arguidu nian, Defensor Publiku Marsal Mascarinhas katak, Tribunal aplika medida Aprezentasaun Periodika ba nia kliente, hanesan defeza aseita ho despaisu nee.
“Despaisu Tribunal nian ba iha arguidu Aprezentasaun Periodika, semanalmente iha Polisia Likisa nian, aumezmu tempu aplika mos Termu Identidade Rezidensia (TIR) ba nia, hodi hein Ministeriu Publiku buka provas seluk,” dehan defeza ba STL iha Tribunal Dili, Kuarta nee.
Nia hatutan, iha alegasaun Prokurador Pedro Baptista husu ba iha Tribunal atu aplika medida koasaun de auzensia, tanba deskonfia keta halo arguidu halai tiha ba rai liu no defeza husu TIR, tanba haree katak arguidu nia oan nain rua sei kiik, no arguidu mos halao hela knaar hanesan funsionariu kontratadu hodi haree ba nia familia.
Hanesan defeza aseita ho despaisu nee, no sei la halo rekursu hasoru despaisu neebe Tribunal foti.
Prosesu nee prezide husi Juiz turnu Jose Quintao, Ministeriu Publiku reprezenta husi Prokurador Pedro Baptista, arguidu hetan asistensia legal husi Defensor Publiku Marsal Mascarinhas.
Tuir kronojia katak, Polisia detein arguidu tanba deskonfia, arguidu mak tula lezada ida ho motor, no ikus mai rezulta lezada hetan kanek. Tanba nee mak Tribunal aplika hela medida AP ba arguidu hodi hein prosesu investigasaun.
Tuir observasaun STL nian, arguidu lori mai iha Tribunal akompanha husi Polisia Likisa, no arguidu lori mai Tribunal iha loron Tersa, iha loron Kuarta mak Juiz prosesu foin lee sai despaisu.
(ter)
