DILI, STLTIMORLESTE.com – Komisariu Komisaun Anti Korupsaun (KAK), Rui Pereira dos Santos fo pose ba Komisariu Adjuntu nain rua (2), atu tulun Komisariu lidera Instituisaun KAK iha Kuartu Mandatu ba periodu 2024-2028.
Nomeiasaun ofisial nee anunsia iha Jornal Republika loron 11 Outubru 2024 Serie II, No. 41, indika emposadu Rosario Salsinha Araujo ba Adjuntu Prevensaun no Sensibilizasaun, no emposadu Migel Acacio Faria ba Komisariu Adjuntu Servisu Apoiu Kooperasaun.
Nomeasaun ba kargu iha KAK ekslusivamente mandatu Komisariu nian bazeia ba Lei No. 8/2009 15 de Julhu 2009. Formasaun estrutura KAK nian ho ninian tarefa sira bazeia ba Dekretu Lei No. 23/2015 no Dekretu Lei n.º 24/2015.
“Emposadu nain 2 laos ema foun ba ita iha setor justisa, Adjuntu Rozario durante tinan naruk iha Diresaun Prevensaun nian, ho fiar neebe Komisariu iha atu servisu diak liu no dezenvolve Instituisaun ida nee, no servisu hamutuk ho kargu xefia sira iha KAK no mos parseiru sira,” dehan Komisariu KAK, Rui Pereira ba jornalista sira iha salaun Sentru Formasaun Juridiku no Judisiariu Kaikoli, bainhira termina pose, Kinta 17/10/2024.
Nia hatutan, la hiit aan aas, maibe hakruk atu servisu hamutuk hodi servisu KAK nian bele hetan apresiasaun husi publiku. Adjuntu Miguel hanesan ema Jurista ida, sei haree ba iha asuntu Administrasaun no Kooperasaun, atu haree ba iha parseiru Governu sira no Instituisaun sira seluk atu servisu bele diak liu tan.
Komisariu dehan, estrutura ida nee seidauk kompleta, tanba Komisariu Adjuntu KAK ba Asuntu Investigasaun Kriminal kandidatu mai husi PNTL no Ministeriu Publiku, maibe infelizmente kandidatu husi PNTL la hetan autorizasaun husi Ministru Interior atraves karta resposta Komissariu nian. No kandidatu husi Ministeriu Publiku depois iha sorumutu entre Komisariu ho Prokurador Jeral Republika nian posibilidade sei mai iha tinan oin.
Sublina tan, Rosario Araujo nuudar Espesialista Anti Korupsaun (EAC) karreira iha Instituisaun KAK neebe hetan fiar husi Komisariu iha komisariu nian, hodi asume kargu nuudar Komisariu Adjuntu ba Prevensaun no Sensibilizasaun. No Rosario iha ona esperiensia naton luta kontra korupsaun hahu husi primeiru mandatu Komisariu nian, funsionamentu iha tinan 2010.
Afirma tan, Komisariu Adjuntu ba Asuntu Servisu Apoiu no Kooperasaun Miguel Acacio Faria nuudar advogadu joven potensial neebe sei tulun mos Komisariu iha parte administrasaun, finansas no kooperasaun eksterna.
Nunee, ho esperiensia Komisariu Adjuntu KAK nain rua (2) neebe iha Lisiensiatura Direitu sei tulun tebes Komisariu, iha ninian kombinasaun konhesimentu, horizonte no esperiensias husi lideres prinsipais KAK nian, hodi bele melhora tebes servisu luta kontra korupsaun iha rai doben Timor Leste.
Espera katak, ho pose ba Adjuntu nain rua nee, Kuartu Mandatu Komisariu KAK nian sei hetan suporta, apoiu politika, finanseiru sufisiente hodi halao funsaun ho melhor tuir lei. No mos bele kontribui rezultadu estratejiku ida inovativu no reflekta nesessidades nasaun Timor Leste nian, iha luta koletiva prevene no kombate korupsaun.
Iha fatin hanesan, Visi Ministru Justisa, Paulo Remedios hatoo parabens ba Adjuntu nain rua.
“Hatoo parabens ba Adjuntu nain rua, agradese ba prezensa husi Prokurador, ba oin husu atu kooperasaun diak entre KAK no Prokurador,” dehan nia.
Nia hatutan, Adjuntu nain rua mos iha esperiensia, ho esperiensia neebe iha sira sei servisu hamutuk, hodi KAK nia servisu bele funsiona ho diak liu tan.
Aleinde nee, Prezidente Komisaun A, Patrocino Fernandes dehan, ema hotu sai sasin ba pose nee, espera Adjuntu nain rua halao knaar tuir juramentu neebe halo ona.
“Hotu-hotu sai sasin tau konfiansa atu sira bele halao servisu tuir juramentu neebe iha, tuir lei, atu asegura rikusoin estadu nian,” dehan Patrocino.
Nia hatutan, Ministeriu Publiku bele fo tan sira nia forsa ba iha KAK atu halao servisu hamutuk hodi kombate korupsaun, neineik no beibeik bele redus numeru korupsaun.
Partisipa iha serimonia solene tomada de pose Komisariu Adjuntu KAK nain rua nee mak Visi Ministru Justisa Paulo Remedios, Prezidente Komisaun A Parlamentu Nasional Patrocinio Fernandes, Adjuntu Prokurador Jacinto Babo, Angelina Saldanha, Adjunta PDHJ Maria Marilia da Costa, no familia emposadu nian, inklui Diretor sira husi KAK.
(ter)
