DILI, STLTIMORLESTE.com – Komandante Jerál Polisia Nasional Timor Leste (PNTL), Komisáriu Jerál Polísia Hendrique da Costa halao vizita ba komunidade musulmanu iha Masjid An-nur, Kampung Alor, Dili.
Nia dehan, nuudar Autoridade Seguransa tenke tau matan no harii komunikasaun diak ho ema hotu, la haree ba kor, estatutu sosial no la haree mos ba relijiaun hodi kontribui ba pas no estabilidade iha TL.
“Iha momentu ida nee mai kumprimenta komunidade Musulmanu iha nee laos ba hotu-hotu, maibe ho estrutura sira. Ida nee laos buat foun maibe iha tinan kotuk mos halao vizita hanesan nee,” hatete Komisáriu Jerál Polísia, Henrique da Costa ba jornalista sira iha Masjid An-nur, Kampung Alor, Dili, Kinta (03/04/2025).
Komisáriu nee hameno hela iha programa balu polísia nian neebe iha tempu badak ekipa Polísia Komunitariu, Polísia Tránzitu no Investigasaun sei mai hasoru malu ho estudante eskola An-nur ba programa polísia vizita eskola nian.
“Ita husu ba komunidade Musulmanu atu nafatin halo komunikasaun ho parte seguransa no karik iha asuntu ruma kona-ba seguransa nian bele kontaktu ba PNTL hodi atende,” nia deklara.
Iha fatin hanesan, Prezidente Konselhu Kuradór Fundasaun Masjid An-nur, Abdullah Said Sagran hatoo agradesimentu boot ba Komandante Jerál PNTL, tanba vizita ida nee hatudu katak PNTL iha atensaun ba komunidade Musulmanu iha Timor Leste.
Nia deklara, komunidade Musulmanu halo jejum durante loron 30, entaun ida nee momentu ida atu hasae fe hodi halo mudansa espiritual.
(jen)
