DILI, STLTIMORLESTE.com – Komisaun B neebe trata asuntu Negosiu Estranejeiru no Seguransa Defeza iha Parlamentu Nasional (PN) husu Polisia Nasional Timor Leste (PNTL) atu halao kontrolu ba loja no sidadaun sira neebe faan fugetis ilegal.
Membru Komisaun B neebe trata asuntu Negosiu Estranejeiru no Seguransa Defeza iha Parlamentu Nasional (PN), Deputadu Natalino dos Santos preokupa ho fugetis neebe Timoroan faan hodi tiru iha fatin-fatin.
Tanba tuir nia, selebra loron Natal ho tinan foun hanesan loron importante ida, tanba selebrasaun natal nee hanesan loron boot ba sarani katolika iha nasaun hotu.
Maibe iha selebrasaun nee Polisia Nasional Timor Leste presiza halao kontrolu ba loja no Timoroan sira neebe faan fugetis iha estrada, tanba uza fugetis la iha autorizasaun husi governu nee bele perturba situasaun la hakmatek no bele halo kanek ema.
“Ita hakarak iha selebrasaunn nee ema hotu-hotu tenki kontenti hodi festeja loron ida nee, maibe kostume Timor nian loron boot hanesan nee ita uza utiliza sasan sira nee atu perturba fali situasaun la fo hakmatek, no oras nee Dili laran komesa iha fugetis tarutu iha fatin-fatin, tanba nee nuudar Komisaun B husu ba PNTL atu halo kontrola ba ema sira neebe faan fugetis,” hatete Deputadu Natalino iha resintu PN, Segunda (02/12/2024).
Maibe nia dehan, atu uza fugetis nee tenki iha loron importante sira hanesan selebrasaun tinan foun nee bele, maibe sunu ida rungu ranga no la fo hakmatek ba ema, deskansa la diak.
No loja neebe atu faan nee tenki iha autorizasaun husi governu mak bele faan, maibe fugetis sira tama ilegal iha iha TL, barak liu husi Atambua, tanba nee husu Autoridade sira nebee halao servisu iha fronteira atu kontrola sasan sira nee.
(alb)
