DILI, STLTIMORLESTE.com – Parlamentu Nasional liu husi Komisaun B neebe trata asuntu Negosiu Estranjeiru Seguransa no Defeza husu ba Polisia Nasional Timor-Leste (PNTL) no Diresaun Nasional Transporte Terrestre (DNTT) atu kontrola labarik sira neebe uza motor elektriku ho marka eskuter.
Deputadu Bankada CNRT, Natalino dos Santos hatete, autoridade seguransa no DNTT tenke tau atensaun ba asuntu nee, tanba labarik sira neebe idade kiik dala barak kondus motor nee iha kapital Dili la uza ekipamentu salva vida hanesan kapasete.
“Alerta ba PNTL sira no Ministeriu Transporte no Komunikasaun atu haree, TumTum deit iha plat, agora ida nee motor lakohi tau regra. Tanba nee iha risku, motor la uza helem sei tilan, agora ida nee velosidade hanesan ho motor no labarik kiik minoridade uza halai iha estrada klaran,” hatete Deputadu Natalino dos Santos ba jornalista sira iha Parlamentu Nasional, Tersa (20/01/2026).
Nia argumenta, dala barak inan no aman sira laiha konsiensia hodi haree situasaun hirak nee, tanba bele fo risku ba labarik sira nia vida.
“Ida fali mak konsiensia inan no aman nian, se haree risku ba oan sira diak liu lalika hola. Agora Timor nee direitu nee mak importante liu, nia la hatene risku ba sira nia aan,” nia esplika.
Tuir Natalino katak, motor ho marka eskuter nee utiliza estrada publiku hodi halo movimentu, tan nee presiza autoridade kompetente sira tau atensaun ba asuntu nee, nunee labele fo risku ba vida umanu.
Iha sorin seluk, Deputadu Bankada KHUNTO, Luís Roberto da Silva reforsa katak, autoridade seguransa no DNTT presiza kontrola motor hirak nee, tanba sira mos utiliza espasu publiku hanesan transporte sira.
“Ita nia joven sira neebe halai la uza kapasete, ita husu PNTL no DNTT atu tau atensaun hodi halo sosializasaun ba lei kodigu estrada ho klean ba ita nia joven sira,” nia sujere.
Nia mos preokupa ho labarik sira neebe idade kiik uza motor halao movimentu iha kapital Dili inklui mos iha kapital munisipiu sira. Tan nee, presiza iha sosializasaun neebe forte ba sidadaun sira, nunee sira mos bele kumpre.
“Balun mos uza motor sei minoridade, ita nia PNTL sira mos halo ona sira nia servisu liu-liu iha Munisipiu Ermera lao tama sai eskola sira hodi halo sosializasaun,” nia salienta.
Entretantu, motor ho morka eskuter nee la uza kombustivel, maibe karega deit nia bateria hodi utiliza hanesan mos motor sira neebe uza kombustivel.
(alb)
