DILI, STLTIMORLESTE.com – Membru Komisaun C Parlamentu Nasional (PN) nebee trata asuntu Finansas Publikas husu Ministeriu Transporte no Komunikasaun (MTK), atu regulariza operasaun Tum-Tum iha teritoriu laran, tanba bele fo ameasa ba ema nia vida.
“Ita haree iha Timor laran Tum-Tum kuaze barak la halimar, no sira nee hetan lisensa operasional ka lae, ou sira merese halai iha estrada nasional sira nee ga ou merese halai deit iha Bairu laran, tanba iha estrada sira husi Lekisa mai Munisipiu Dili nee hau haree nee perigu la halimar, tanba bainhira halai hasoru fuzu bobot bele soke buat sira nee hotu,” hatete membru Komisaun C, Deputadu Jose da Cruz wainhira halo audiensia ho MTK ho MOP, iha plenaria PN, Dili, Kinta (24/10/2024).
Governu tuir nia, presiza regulariza operasaun Tum-Tum iha teritoriu, tanba durante impede ema seluk nia atividade no estraga deit panorama estrada nian.
“Hau hanoin ida nee presiza iha esplikasaun ida tanba dala ruma estraga panorama iha Estrada, tanba ita lao dala ruma movimentu ladun livre, se bele hare took para atu regulariza ida lori Tum-tum nee iha sim ga lae,” tenik nia.
(alb)
