DILI, STLTIMORLESTE.com – Komisaun E neebe trata asuntu Infraestrutura iha Parlamentu Nasional (PN) kompromete tinan nee sei finaliza lei urbanizasaun, hodi regulariza sidadaun sira neebe atu harii uma iha territoriu laran.
Prezidente Komisaun E, Marcos Xavier hatete, tuir lo-loos Komisaun E halo audiensia publika ida ho MOP, MPIE ho MAE atu koalia kona-ba lei urbanistik, maibe tanba ministeriu relevante sira ohin labele marka prezensa, tanba nee audiensia nee adia tiha ba loron seluk.
Tanba nee, Prezidente Komisaun E kompromete sei diskuti lei nee iha tinan nee hodi bele haforsa Governu atu kontrola konstrusaun sira neebe harii iha Dili no harii iha munisipiu sira seluk.
“Ami sei aselera no finaliza lei ida nee iha tinan nee para regulariza Xina sira, tanba agora nee ita hakfodak uma andar ida sae tanba ita seidauk iha lesensa, maibe lei nee diskuti hela no wainhira aprova ona, ba oin MOP no MAE atu implementa lei nee,” hatete Marcos ba jornalista sira iha resintu PN, Dili, Kinta (23/01/2025).
Nia hatutan, wainhira lei finaliza no tama ona ba vigor mak sei biban ba MAE ho MOP atu regulariza ema sira neebe atu harii uma tenki husu lisensa ba Governu.
Tanba Xina sira oras nee halo uma arbiru deit iha Dili laran tanba lei seidauk iha atu regulariza.
“Agora Xina sira iha Dili laran nee harii uma arbiru deit, tanba la iha lei ida atu kondena sira no Ministeriu Obras Publikas labele impede sira tanba lei la iha,” dehan nia.
(alb)
