DILI, STLTIMORLESTE.com – Komisaun F neebe trata asuntu Saude Seguransa Sosial no Igualdade Jeneru iha Parlamentu Nasional (PN) foin lalais nee halo fiskalizasaun ba sentru saude sira iha Munisipiu Bobonaro no Likisa, identifika ambulansia multifunsaun barak avaria ona.
Lia hirak nee Prezidente Komisaun F neebe trata asuntu Saude Seguransa Sosial no Igualdade Jeneru iha Parlamentu Nasional (PN), Deputada Maria Bareto hatoo ba jornalista sira iha PN, Kuarta (26/03/2025).
“Semana rua tutuir malu Komisaun F ba halo fiskalizasaun iha Munisipiu Likisa no Bobonaro, ami identifika katak kuaze sentru saude sira iha problema boot, tanba ambulansia multifunsaun barak mak kondisaun aat ona,” hatete Deputada Maria Bareto.
Nia hatutan, Ministra Saude no Visi Ministru nain rua presiza haree lalais problema nee ho seriu, tanba ambulansia avaria hotu mak sei impede pesoal saude sira atu halo atendimentu urjenti ba pasiente sira iha sentru saude atu transfere tutan mai hospital referal sira.
Tanba bainhira pesoal saude sira labele halo servisu atu atende pasiente sira neebe sei afeita moras seriu liu atu transfere husi sentru saude ba hospital referal, nee bele hasoru difikuldade.
“Ami haree hanesan asuntu ida nee seriu tebes, tanba ambulansia multifunsaun kuandu aat ho tempu neebe mak naruk no Ministeriu la halo manutensaun lalais mak ida nee sei afeta ba profisionais saude sira neebe mak ezerse sira nia funsaun iha sentru saude nomos hospital referal sira,” tenik nia.
(alb)
