DILI, STLTIMORLESTE.com – Prezidente Komisaun G neebe trata asuntu Edukasaun, Juventude, Kultura no Sidadania iha Parlamentu Nasional (PN), Deputadu Armando Lopes hatete, iha tinan 2025 Komisaun G sei halo fiskalizasaun ba osan US$ 20, neebe kada tinan estudante sira kontribui ba Univsersidade Nasional Timor Lorosae (UNTL).
Nia dehan, objetivu husi fiskalizasaun neebe Komisaun G sei halo nee mak atu buka hatene osan US$20 neebe kada tinan estudante sira kontribui ba UNTL, durante nee utiliza ba saida deit.
“Orsamentu neebe estudante sira kontribui US$ 20 ba kaisa UNTL nee kada tinan kuaze rihun US$ 60 ba leten, maibe ninia rezultadu la iha nee mak estudante sira levanta preokupasaun sira nee, tanba nee ami sei halo fiskalizasaun direita hodi haree iha terrenu iha tinan 2025,” hatete Deputadu Armando ba jornalista sira iha PN, Kuarta (18/12/2024).
Deputadu nee hatutan, iha tinan 2025 Komisaun G programa prioridade neebe Komisaun G iha mak sei ba halo fiskalizasaun atu haree rezultadu husi kontribuisaun US$ 20 nee halo deit ba saida.
Nunee iha loron Tersa (17/12) Komisaun G halo ona enkontru ho Reitor Universidade Timor Lorosae (UNTL), Ministru Ensinu Superior Siensia no Kultura hodi diskuti kona-ba preokupasaun estudante sira nian, ligadu ba orsamentu US$ 20 neebe estudante sira kontribui ba kaisa UNTL.
Maibe iha enkotru nee Reitor esplika katak, tuir regras neebe iha relatoriu labele aprezenta direita ba estudante sira, maibe enkontru iha Konselhu mak foin bele transmite fali ba estudante sira.
(alb)
