DILI, STLTIMORLESTE.com – Parlamentu Nasional (PN) liu husi Komisaun G neebe trata asuntu Edukasaun Juventude Kultura no Sidadania halao fiskalizasaun ba kampus Sentral Universidade Nasional Timor Lorosae (UNTL), hodi haree besik kondisaun universidade publiku nee.
Tuir Prezidente Komisaun G, Deputadu Armando Lopes katak, ohin halao enkontru ho Reitor UNTL no estrutura sira, bazeia ba Komisaun G nia kompromisu neebe halo iha fulan Dezembru ho Reitor atu halo fiskalizasaun ba UNTL.
“Ami halo fiskalizasaun tanba bazeia ba situasaun neebe mak akontese iha UNTL katak, iha preokupasaun barak neebe aprezenta husi estudante sira, preokupasaun ida mak UNTL loke kursu hamutuk 10 maibe menus profesores,” hatete Prezidente Komisaun G, Deputadu Armando Lopes ba jornalista sira iha kampus Sentral UNTL, Kinta (09/01/2025).
Prezidente Komisaun G nee husu Komisaun Funsaun Publika (KFP) atu bele buka solusaun ba problema neebe Universidade Nasional Timor Lorosae (UNTL) enfrenta.
Tanba problema neebe iha daudaun nee UNTL loke kursu pur volta hamutuk 10, maibe sei menus profesores.
“Prosesu sira oras nee lao ona iha Komisaun Funsaun Publika no UNTL iha deit dosente 21, maibe ita presiza dosente liu nain 50 resin, entaun ami sei rekomenda ba funsaun publika atu haree problema nee iha tinan 2025 nee,” tenik nia.
(alb)
