DILI, STLTIMORLESTE.com – Komisaun G iha Parlamentu Nasional (PN), Gabriel Soares kestiona kona-ba edifisiu edukasaun munisipal iha Munisipiu Ainaro no Vikeke neebe kondisaun ladun diak ona.
Tuir Gabriel katak, edifisiu edukasaun munisipal iha Munisipiu Ainaro no Vikeke ladun diak ona, Governu presiza tau atensaun.
“Ami hato’o ba iha Governu atu tau atensaun seriu ba edifisiu Servisu Edukasaun Munisipiu Ainaro ho Vikeke, tanba ami halo fiskalizasaun kuaze ba iha munisipiu sira nee hotu no foku prinsipal ami nian mak ba iha asuntu edukasaun nian, liu-liu iha munisipiu sira ami halo enkontru ho Diretor Servisu Edukasaun Munisipiu neebe ami observa ho matan, munisipiu rua nee sira nia edifisiu servisu nia kondisaun ne’e ladun diak,” Deputadu Gabriel Soares hatoo kestaun nee liu husi plenaria iha Parlamentu Nasional, Segunda nee (24/03/2025).
Deputadu Gabriel haktuir, iha Vikeke kuandu udan bee la tun ba valeta, maibe bee tama hotu ba iha fatin servisu funsionariu sira no diretor nia fatin, no iha Ainaro husi kedas 1999 mai sira hela coby house ida neebe kuandu ami ba halo enkontru difisil tebes, ami buka fatin para oinsa ho diretores sira atu enkontru iha munisipiu neeba.
Iha fatin hanesan, Deputadu Bankada PD, Mariano Fernando X. Malik hatutan tan katak, kona-ba edifisiu edukasan iha Munisipiu Ainaro, loos duni edifisiu ida ne’e kleur tebes ona.
“Ida ne’e mak povu Ainaro uza hela, too agora seidauk iha edifisiu ida ne’ebe mak bele fo dignu ba sira para bele halo servisu hanesan Funsionariu Edukasaun Munisipiu Ainaro,” katak nia.
Hatan ba kestaun nee, Visi Ministru Asuntu Parlamentar, Aderito Hugo da Costa afirma, edifisiu Edukasaun Munisipiu Ainaro no Vikeke kondisaun ladun diak sei envia ba Ministériu Edukasaun hodi haree asuntu nee, maibe ita hotu hatene katak kona-ba edifisiu sira servisu ninian laos deit iha nivel munisipiu.
“Edifisiu Ministeriu Edukasan nian iha sentral mos kondisaun grave hotu ona atu uza, tanba durante ne’e osan ita tau barak liu ba aumenta aulas no aumenta eskola iha baze, tanba ne’e mak seidauk, maibe ha’u sei husu ba Ministeriu Edukasaun para tau atensaun ba infraestrutura iha servisu sira iha nivel munisispiu, liu-liu munisipiu Ainaro ho Vikeke nian,” nia hakotu.
(EST 2)
