DILI, STLTIMORLESTE.com – Aban Komisaun G neebe trata Asuntu Edukasaun Juventude Kultura no Sidadania iha Parlamentu Nasional (PN) sei halo fiskalizasaun direita ba Universidade Nasional Timor Lorosae (UNTL), nunee bele hatene lo-loos preokupasaun neebe estudante sira levanta akontese duni iha UNTL ka lae.
Prezidente Komisaun G, Armando Lopes hatete, iha fulan Dezembru tinan kotuk, Komisaun G bolu ona Reitor UNTL ho nia estrutura hodi diskuti kona-ba problema neebe estudante sira levanta.
Tanba nee Komisaun G sei halo fiskalizasaun direita ba UNTL, nunee bele hatene lo-loos preokupasaun neebe estudante sira levanta nee akontese duni iha universidade publiku nee ka lae.
“Tanba nee mak aban ami sei halo fiskalizasaun direita ba UNTL, ami sei haree saida mak akontese iha neeba, mak ami sei koalia ho Governu hodi bele buka solusaun ba problema neebe iha,” hatete Prezidente Komisaun G, Armando ba jornalista sira iha resintu Parlamentu Nasional (PN), Kuarta (08/01/2025).
Nia hatutan, Komisaun G tenki halo fiskalizasaun hodi bele hatene problema neebe iha, tanba kada tinan Parlamentu Nasional aprova ona orsamentu neebe boot hodi finansia universidade publiku nee, maibe problema sei kontinua eziste.
(alb)
