DILI, STLTIMORLESTE.com – Governu liu husi Sekretariu Estadu Igualdade (SEI) realiza Forum Komisaun Inter Ministerial, hodi hahu halo diskusaun kona-ba Planu Asaun Anual (PAN) ba tinan 2022 too 2032.
Sekretariu Estadu Igualdade (SEI), Elvina Sousa Carvalho hatete, Komisaun Inter Ministrial nee rasik mosu tanba ezijensia husi lei kontra violensia domestika hodi haree ba PAN nian.
“Komisaun Inter Ministrial nee rasik mosu tanba ezijensia husi lei kontra violensia domestika ne’ebe mak fo mos kompetensia ba SEI atu kria komisaun interministerial ida nee atu haree ba implementasaun planu asaun nasional violensia bazeia ba jeneru,” dehan SEI, Elvina iha salaun Maria Gorete Kaikoli, Dili, Segunda nee (24/03/25).
Governante nee hateten, Komisaun Inter Ministerial nee rasik publika ona liu husi rezolusaun Governu Nu. 49/2024 fo kompetensia no responsabilidade ba SEI hodi organiza enkontru regular kada fulan neen (6), entre Sekretaria Estadu ba Igualdade no membru Komisaun Inter Ministerial sira hotu tuir orientasaun neebe temi ona iha rezolusaun, liu-liu kolaborasaun no kooperasaun ida neebe transparente, efikas no efetivu.
Membru husi komisaun interministerial nee rasik mai husi Ministeriu Justisa, Ministeriu Saude, Ministeriu Solidaria Sosial, Ministeriu Interior no mos Ministeriu Estatal.
Sekretariu nee hatutan, Komisaun Inter Ministerial ba Koordenasaun no Implementasaun no Monitorizasaun Planu Asaun Nasional Violensia Bazeia Jeneru ba Periodu 2022-2032.
“Ami hatoo agradese wain ba membru Komisaun Inter Ministerial ba Koordenasaun no Implementasaun no Monitorizasaun PAN-VBJ 2022-2023 neebe marka prezensa iha enkontru nee, enkontru ida nee hanesan enkontru ba dahuluk iha tinan ida nee ho objetivu atu hahu introdus mekanizmu Komisaun Inter Ministeriál ba Koordenasaun no Implementasaun no Monitorizasaun PAN-VBJ 2022-2032 neebe tuir Rezolusaun Govermu Nú. 49/2024, loron 06 fulan Setembru,” hateten nia.
(EST 3)
