DILI, STLTIMORLESTE.com – Portavós Komisaun Rekrutamentu ba vaga membru Polisia Nasional Timor Leste (PNTL) foun 2025, Superintendente Polísia António da Luz hatete, Komisaun Rekrutamentu ba vaga membru PNTL foun 2025 deside halo adiamentu ba prova médiku ba kandidatu hamutuk 400, tanba reajente halo teste iha Laboratóriu Nasional Hospitál Nasionál Guido Valadares (HNGV) laiha.
Nia esplika, tuir lo-loos prova médiku ba kandidatu membru PNTL nain 400 nee halao iha dia 10/2/2026 too 20/2/2026, maibé bainhira Depatamentu Saúde Komando Jerál Polísia Nasionál Timor Leste halo tiha koordenasaun ho parte Laborátoriu Nasionál laiha reajente, tanba komisaun deside halo adiamentu teste médiku ba kandidatu sira.
“Aproveita biban ida nee atu informa fali ba ita boot sira hanesan semana kotuk liu ba fo sai ona ba públiku katak, iha dia 10 ita sei halao teste mediku ba kandidatu aptu 400 pesoas nee, maibe depois de parte departamentu saude halo koordenasaun ho Laboratóriu Hospitál Nasionál Guido Valadares ba konfirma katak ekipamentu neebe mak halo teste reajente too agora seidauk iha. Tanba nee mak aproveita biban ida nee atu fo sai ba públiku liu-liu ba kandidatu sira atu bele hein too ekipamentu nee too ona, ami sei informa fila fali ba ita boot sira atu mai tuir teste saúde nian,” hatete Portavós Komisaun Rekrutamentu ba vaga membru Polisia Nasional Timor Leste (PNTL) foun 2025, Superintendente Polísia António da Luz liu husi konfrénsia imprensa neebe mak halao iha Sentru Formasaun Pólísia Komoro, segunda (09/02/2026).
Nia dehan, teste médiku ba kadetes 400 nee komisaun rekrutamentu PNTL 2025 hadia seim data.
“Sim, tanba ita tenke hein parte laboratóriu nian, tanba laos ita mak halo ekipamentu nee no sosa aimoruk nee, tanba liu husi Laboratótriu Nasionál, ita tein, bainhira ekipamentu nee mai mak ita sei anunsia ba públiku, espera katak tempu badak mai ona, labarik sira nee bele teste,” nia deklara.
Ofisiál Superiór PNTL nee informa, husi Komisaun Rekrutamentu kontinua mantein fo teste mediku ba kandidatu hamutuk 400 neebe públika ona iha semana kotuk no tuir rezolusaun governu nian númeru 10/2025.
“Ba sira neebe teste mediku nee komisaun rekrutamentu mantein nafatin numeru 400 nee kontinua avansa ba iha teste mediku nian, ida nee mak ita kontinua, tanba bazeia ba rezolusaun governu numeru 10/2025 neebe mak fo sai vagas neebe presiza 400 pesoas, ida nee mak ita mantein nafatin,” nia informa.
Iha fatin hanesan, Xefe Departamentu Saude Komando PNTL, Analita do Rêgo realsa katak, oráriu teste mediku ka prova médika ba kandidatu sira tuir lolos halo iha dia 10 fulan Fevreiru too dia 20 Fevreiru 2026, maibe tuir konfirmasaun neebe mak Departamentu Saúde halo ho Laborátoriu Nasionál katak, fasilidade neebe mak atu halo teste kanidatu sira nee seidauk too iha nee, tanba tenke hein husi rai liur.
“Entaun ita tenke halo mudansa ba iha oráriu, PNTL nuudar institusaun Estadu, ami hein deit bainhira reajente too iha nee ami bele fo hatene data fiksu fali ba públiku,” nia infoma.
Nia koalia, fasilidade neebe uza atu halo teste ba kandidatu sira mak ho reajentes hanesan Complete Blood Count (CBC), Kimia ho reasent sira seluk.
“Ami seidauk hatene data fiksu, tanba tenderizasaun ba ekipamentu sira nee husi rai liur, entaun kuandu too sira sei fo hatene ba ami no ami sei anúsiu ba ita boot sira,” nia afirma.
(jen)
