DILI, STLTIMORLESTE.com – Komisaun rekrutamentu ba Juiz neebe atu haknaar aan iha Supremu Tribunal Justisa (STJ), agora daudaun hahu halo ona servisu hafoin Prezidente Republika José Ramos Horta nomeia tiha Avelino Coelho nuudar Prezidente ba komisaun refere.
Tuir Komisariu Pedro Camoes katak, depois Prezidente Repúblika publika tiha sira nia naran husi loron 6 Janeiru 2026, komisaun halo kedan nia servisu.
“Ami halo ona servisu no aprova ona ami nia rejimentu internu depois dokumentus sira oinsa atu avalia ba futuru preparasaun atu simu ekipa juri, no diskute ba materia sira neebe mak oinsa halo avaliasaun ba futuru kandidatu Juiz sira. Reuniaun nee ami halo dala hira ona, ami reuniaun tan no rejimentu aprova tiha ona no proposta ruma husi komisariu sira mai ami diskute depois mak ami aprova,” dehan Pedro Camoes ba jornalista sira iha Kaikoli, Kinta [29/01/2026).
Nia hatutan, komisaun ba rekrutamentu nee kompostu husi ema nain tolu neebe nain ida husi Prezidente Repúblika mak nomeia no ema nain rua Parlamentu Nasional mak nomeia.
Nia esplika, iha komisariu mak sira nain tolu nee, depois mak hetan apoiu husi Parlamentu Nasional nain rua ou nain tolu, rekruta tan ema balun iha futuru, aban bainrua nia, alista reuniaun anota reuniaun, depois iha karta ruma se karik iha neeba bele apoiu.
“Sira nain tolu halo servisu seriu tebes, tanba nee hanoin katak buat hotu sei lao tuir nia tempu. No buat hotu kuandu aprova, entaun rekrutamentu nee lao iha fulan Maiu sira nee, se dezafiu laiha, se iha problema ruma posivel sei estende tan servisu,” dehan nia.
Nia afirma, agora daudaun prosesu sira nee lao ona, iha fulan Fevereiru komisaun sei anunsia vaga ba juri rekrutamentu nian no Marsu juri sira sei halo nia servisu, no juri nee bele mai husi Timor oan, Portugal ka Brazil.
Nia argumenta, vaga ba juri rekrutamentu Juiz nee komisariu mak loke, ekipa juri nee tenke ema neebe mak mais esperiensia, se mais esperiensia ita bele inklui mos Timor oan. No kriteriu ba ekipa juri nia tenke ema sira minimu tenke servisu iha Juiz tinan 25, entaun ba sira hirak neebe servisu tinan 25 bolu jubiliarius.
Mezmu nunee, sira nee mak aban bainrua hola parte iha ekipa de juri depois loke vaga sira nee, laos ida deit rua no tolu sira kompleta ona juri sira nee mak sei halo ezame, halo entrevista, hotu tiha mak nia rezultadu nee fo mai komisaun.
“Ekipa juri neebe komisaun rekruta sei halo rekrutamentu ba Juiz sira neebe atu halo funsaun iha Supremu Tribunal Justisa no Tribunal segunda Instansia, ekipa juri nee nia servisu atu simu dokumentus husi konkorentes sira ema Timoroan neebe mak interesadu ba vaga sira iha Tribunal Supremu no mos ba Tribunal Rekursu,” katak nia.
Nia akresenta, Juiz sira neebe atu konkore ba vaga iha Supremu Tribunal no Tribunal Rekursu nia kriteriu nia tenke sidadaun Timoroan, bele dehan sira mais 10 anos esperiensia iha Timor akademiku ba Defensor Publika no majistradu.
Tanba tuir espetasaun Prezidente Repúblika José Ramos Horta sedu liu iha fulan Maiu 2026 ikus instalasaun Supremu Tribunál Justisa bele harii ona ka tarde fulan Novembru 2026 Supremu Tribunal bele instaladu ona.
Nia dehan, komisaun esforsu hela, hein reuniaun parese fim de Janeiru nee regras sira nee aprovadu no rekezitus sira nee mos aprovadu, nunee iha Fevereiru ita halo anunsia ba vaga juri rekrutamentu nian no Marsu juri bele halo nia serbisu ona.
Iha fatin ketak, Akademiku UNTL, Rafael De Jesus dehan, husu komisaun atu kria regra neebe rigor.
“Hanoin ekipa neebe iha kria regulamentu neebe rigor, atu autor judisiariu neebe sei ba tur iha STJ, tenke iha kapasidade diak, atu labele hamosu duvidas iha sosiedade,” dehan nia.
Espera katak Juiz sira neebe sei ba tuir iha STJ iha kapasidade neebe diak atu halao knaar, liu liu atu lori justisa lao ba oin.
(ter)
