DILI, STLTIMORLESTE.com – Prezidente Komisaun Supervizasun ba rekrutamentu kandidatu vaga foun Polisia Nasional Timor Leste (PNTL) tinan 2025.
Paulo Assis Belo informa, durante komisaun supervizasun halo revee ba lista kandidatu admitudu vaga rekrutamentu membru PNTL foun 2025 deteta katak, polísia nia oan hamutuk nain 71 okupa númeru kiik iha lista rekrutamentu vaga membru PNTL foun .
“Hau hakarak fo hateten deit katak, polísia nia oan neebe ami hetan dadus nee husi lista 400 nee iha 71 pesoas polísia nia oan, konforme sira fo mai iha 71. Ita sei investiga lai tebes iha deit 71 pesoas nee ga, ka sei iha no mos jerasaun patriota ka veteranu nia oan iha 72 pesoas. Ita sei investiga ida nee de’it ga sei iha tan, nee ita sei investiga”, hatete Prezidente Komisaun Supervizasun, Paulo Assis Belo hateten ba jornalista sira iha Sentru Formasaun Polísia (CFP) Komoro ba jornalista, Segunda (16/03/2026).
Paulo Assis rekonhese katak membru PNTL nia oan kuaze nasionál too munisípiu nia oan konkore hotu vaga rekrutamentu membru PNTL no okupa lista neebe kiik.
“Sira nee kuaze iha munisípiu idak-idak sira nia oan nee iha duni, maibe atu okupa lista um too dez nee lae balun lista kiik. Maibe hau labele fo uluk lai resposta ida nee lo-loos tanba sei iha verifikasaun nia laran”, nia deklara.
Nia hatutan, lo-loos duni katak, uluk nee iha duni kouta 20% ba polísia nia oan no 20% ba jerasaun patriota, mai PDHJ levanta problema ida nee ba Tribunál Rekursu no TR konsidera katak ida nee inkonstituisiona.
“Kouta nee ami la aplika ida ba polísia nia oan tantu veteranu nia oan. La aplika nee signifika katak hotu-hotu iha oportunidade bele tuir hotu,” nia relata.
Nia informa, supervizasun nee ekipa supervizasun halo nee uza mekanizmu neebe mak atu haree tuir deit saida mak Governu husu revee hotu dokumentu sira nee.
“Maibe em prinsipiu ami haree uluk lai 400 nee, kuandu 400 nee ita haree katak la diak ona, ita lalika simu, restu ne’e ita lalika simu,” nia koalia.
Nia hatutuan, agora daudaun seidauk bele fo sai lai katak iha inidisiu ba iha regularidade sei haree hotu tiha depois de reuniaun mak sei haree iha indisiu ka lae depois fó sai ba públiku.
“Hau labele fo sai uluk lai, hau seidauk bele fo sai lai tanba sei haree hotu tiha lai depois de iha indisiu iha ga lae depois ita fo sai ba públiku. Hau labele fo sai uluk, orsida hau manipula komisaun nia hanoin sira nee, kuandu atu koalia nee ita tenke koalia ho dadus tanba orsida hau manipula hanoin sira nee ladun diak”, nia subliña.
Nia deklara, Komisaun Supervizasun nee envolve iha nee husi jerasaun patriota, Deputadu nain rua mos iha laran iha Prezidensia Repúblika mos iha laran, ajudante kampu rasik mak iha laran, momentu ne’ebá nia mak mai rasik, iha Prevedór Direitus Umanus mós iha laran, nunee mos iha funsaun públika mos iha laran hotu, Adidu Seguransa Embaixada Portugal nian Guarda Nasionál Repúblikanu ( GNR) mak mai, Xefe Austrália Federal Polísia (AFP).
Nia hatutan, karik rezultadu nee iha duni familiarizmu ka iha irregularidade iha laran sei rekomenda reteste.
“Ita haree lai ninian irregularidade nee boot liu ka oituan liu, ita haree ita nia rezultadu mak ita fo, depois komisaun nee sei la halo rekomendasaun Komisaun nee sei halo deit relatoriu ba Governu depois Konselhu Ministru mak sei toma desizaun atu anula total ka atu anula parsiál ka nee horsida governu mak toma konta tanba komisaun mandatu neebe mak Governu fo mai halo deit revizaun ba prosesu hothotu, haree failhansu iha neebe ami haree depois mak toma desizaun”, nia afirma.
Nia dehan, Komisaun nee hahu halo nia servisu loron 20 nia laran tuir mandatu ne’ebé Governu fo, tanba hahú 26 Fevreiru liu ba komisaun supervizasun hahu nia serbisu no 27 Marsu mai nee tenke entrega ona relatóriu ba Governu.
“Komisaun nee forma ami komesa servisu iha dia 26 Fevereiru liu ba nee, ami halo ami nia primeira reuniaun, ami halo reuniaun dala tolu, agora daudaun komisaun komesa halo revee fali prosesu sira nee, liu-liu revee uluk lai sira ida 400 pesoas ida neebe liu nee. Revee uluk ami haree took iha failhansu ka laiha failhansu iha manipulasaun ka laiha manipulasaun ko’alia, dehan familiarizmu ka laiha familiarizmu komisaun ne’e sei haree ida nee”, nia remata.
Nia dehan, revee nee signifika komisaun hahu haree notas sira fo sai nee katak notas sira nee notas orijinal ka lae.
“Ita haree provas sira neebe sira halo nee de akordu duni ho ne’e duni ga lae ga iha manipulasaun ka laiha ne’e mak ita haree”, nia afirma.
Entretantu informasaun neebe STL asesu katak, durante nee komisaun supervizasun simu reklamasaun sira hamutuk 200.
(jen)
