DILI, STLTIMORLESTE.com – Koamandante Jerál Polísia Nasional Timor Leste (PNTL), Komisáriu Asisténte Polísia Afonso dos Santos hatete, vaga rekrutamentu foun ba ajente polísia tenke ho efetivu 750.
“Não, hau nia opiniaun nee laos 400, maibé hau nia opiniaun nee iha rekrutamentu hamutuk 750 atu kobre hotu, tanba eleisaun besik ona, 2027 eleisaun prezidensiál, 2028 eleisaun parlamentár, entaun urjentemente rekruta nee laos 400, maibe 700 ital para ita garante fatin sira nee,” Koamandante Jerál Polísia Nasional Timor Leste (PNTL), Komisáriu Asisténte Polísia Afonso dos Santos ba jornalista sira bainhira halo vizita ba iha kuartel Unidade Polisia Máritima (UPM)loron tersa (31/03/2026).
Nia dehan, nuudar Komisáriu garante rekrutamentu sei atinji efetivu 700 ital.
“Be hau mak Komandante Jerál nusa mak la garante. Ha’u mak Komandante Jerál ha’u deside ba Ministru hakarak ka lakohi tenke ser nunee, tanba ejizensia. Ita hakarak eleisaun prezidensia diak, eleisaun parlamentár diak entaun presiza,” nia informa.
Nia komprometidu atu hadia mekanizmu rekrutamentu foun nee. “Sim, agora tenke ser rekrutamentu mudansa tanba Primeiru Ministru koalia tiha ona, pasadu tenke ser la autoriza, ita tenke haree komitmentu foun,” nia tenik.
Komandante Jerál nee mos promete sei hadia komisaun promosaun ba ajente PNTL sira inklui komisaun ba rekrutamentu.
“Komisaun promosaun mos hau hakarak foun hotu, ida tuan hau la uza, atu garante labele mosu tan familiarizmu,” nia esplika.
Nia deklara, rekrutamentu nee hotu-hotu formaliza iha Sentru Formasaun, ida nee mak loos, laos foti fali iha Komando Jerál, ida nee nao isto, nao autoriza.
Nia koalia, nuudar Komandante Jerál nia pozisaun mak nunee no sei hadia mekanizmu rekrutamentu, tanba Ministru Interiór tenke aseita ho mekanizmu ida nee.
“La aseita saida, hau mak komandante jerál nia la aseita saida, so Komandante Jerál, hakarak ka lakohi rekrutamentu tenke ser iha Komando Jerál laos iha Ministeriu. Iha Ministeriu nee mak agora sai tiha hanesan nee,” nia hatutan.
“Hau la fo sala hau nia Ministru, sala nee iha komisaun, komisaun mak ladun sériu halo ida nee. Ida nee mak akontese nunee, imi hotu hatene too”, nia fundamenta.
Nia hatutan, rekrutamentu foun neebe mai nee Komando mak jere, Ministru haruka ida mak mai observa mak nee ona.
“Rekrutamentu nee sei halao iha sentru formasaun hotu, Sentru Formasaun mak iha poder tomak halo buat nee”, nia subliña.
Komisáriu Afonso afirma, nuudar Komandante Jerál apoia Primeiru Ministru nia hakarak neebe hateten rekrutamentu foun nee tenke aplika sistema eleminatóriu.
(jen)
