DILI, STLTIMORLESTE.com – Komandante Komponente Navál, Komodoro Higinio das Neves bandu forsa Komponente Naval feto tantu mane labele halo tiktok uza atributu militar.
Nia dehan, kuandu militar ida uza uniforme militar halo tiktok mak komando sei foti medida.
“Hau apela bebeik iha nee, labele loron ida ita tanba deit ita nia gensi mak ita hasai ita boot sira nia boiña ba deskasa iha uma. Diak liu evita ona ba tanba hatene ona katak, labele hatais farda uza atributu militar hodi halo tiktok iha rede sosial nee la autoriza,” hatete Komandante Komponente Naval, Comodoro Higinio da Neves iha nia intervensaun iha ambitu fo pose ba Segundu Komandante Komponente Navál Kapitaun Fragata Graduadu Nicolau Sousa iha baze Naval Hera, Segunda (10/11/2025).
Komodoro esplika, se hakarak militar halo tiktok uza faru sivil, labele uza atributu militar.
“Se ita boot sira hakarak halo ida nee, halo ho sivil nian, maibe nunka uza atributu militar halo tiktok. Halo foto nee diak, maibe tiktok ida neebe estraga imajen forsa nian la autoriza,”nia tenik.
Komandante Neves nota katak, iha rede sosial tiktok nee militar feto sira mak dala barak halo tik tok tanba nee prevene ida nee.
Tuir nia hahalok sira nee maka bele kontribui hasai militar iha instituisaun hanesan sai mak foin dadaun akontese iha Komponente Navál, neebe hasai nia membru sira tanba dala ruma komportamentu mos kontribui.
“Se komportamentu nafatin liga ba hahalok sira neebe halo nee mak nafatin, mak ita sei bele haree katak ladiak sei hasai,” nia haktuir.
Nia deklara, mai iha forsa atu kontinua hamorin prestijiu FALINTIL nian, tane aas valores neebe FALINTIL husik hela.
Jornalista: Jeniche da Costa
Editora: Domingas Gomes
