DILI, STLTIMORLESTE.com – Autoridade Inspesaun no Fiskalizasaun Atividade Ekonomiku Sanitaria Alimentar (AIFAESA) deteta kompanhia 3 komete infrasaun asesoria grave no taka provizoriu durante fulan 1 no kompanhia 6 komete infrasaun kmaan sei hetan sansaun administrativu selu koima ba estadu hahu husi US$ 250 too US$ 75.000 ba infrasaun grave.
Tuir Diretora Operasional AIFAESA, Claudinha Soares Pinto ba STL iha ninia knaar fatin AIFAESA Kaikoli, Dili, Kuarta (02/03/2025) katak, hafoin hetan informasaun neebe posting iha Facebook neebe viral iha Oekusi, entaun ekipa AIFAESA tun direitamente iha Oekusi atu halo inspesaun no fiskalizasaun bazeia informasaun AIFAESA hetan informasaun husi komunidade sira iha Oekusi.
Husi inspesaun neebe maka diriji diretamente husi Inspetor Jeral AIFAESA, Odete Viegas da Silva ho Departamentu Operasional AIFAESA, nunee mos husi Departamentu Planeamantu Alimentar Risku no Laboratoriu, Parte Patrimoniu no urbanizasaun AIFAESA nian ho ekipa integradu husi RAEOA nian kompostu husi Polisia Nasional Timor Leste (PNTL) Rejional Oekusi lideradu husi Komandante Interinu Inspektor Polisia, Angelo Quelo ho Prezidente Camara Comersiu Industria Timor Leste (CCI-TL) Oekusi, Julio Maak, Servisu Rejistu no Verifikasaun Emprezarial, Institutu Publiku (SERVE), Inspesaun Trabalhu Ministeriu Komersiu no Indutria (MKI), Polisia Nasional Servisu Investigasaun Kriminal (PNSIK) no Autoridade Suku Costa halo operasaun ba loja sira iha Oekusi durante loron rua nia laran, hahu husi Segunda (31 Marsu too 1 de Abril 2025).
“Iha loron primeiru, ita konsege halo inspesaun ba loja 4 iha kapital Oekusi nian, ita fo sansaun asesoria ba iha estabelesimentu ka loja 2 neebe ekipa detekta ho kestaun ijiene. Ita hotu hatene katak husi estabelesimentu 2 nee, nia komete iregularidade nee mak.loja ida konhesidu iha Oekusi maka loja Bacara Plaza, ida nee ami haree iha infrasaun neebe makaas loos. Bainhira ita too iha estabelesimentu nee, ita laos haree ba loja nee deit, maibe ita mos haree kona ba ninia armajen nomos fatin ba atu halo re-paking hatudu momos katak la priense rekezitus, tanba nee AIFAESA,I.P foti desizaun taka provizoriu loja tolu maka hanesan Bacara Plaza, Loja Xineja ida iha Numbey, Suku Costa no Loja Xineja ida iha Tono, Suku Cunha Sub Rejiaun Pante Makassar, Rejiaun Adinistrativu Espesial Oekusi-Ambeno (RAEOA),” dehan Diretora Operasional AIFAESA.
Nia haktuir tan katak, atividade iha loron segundu nian, kontinua halo inspesaun ba iha loja Tono, loja hirak nee komete irregularidade hanesan, Falta ijiene, Produtus balun neebe mak estragus tanba konjelador ladiak, halo naan balun iha zelera laran mamar loos, produtus balun trankadu no kahur malu ho sasan seluk no produtu balun liu prazu, tanba nee AIFAESA orienta taka provijoriu durante loron 30, bele mos latoo ida nee, depende sira priense ona rekezitus neebe maka AIFAESA fo ba sira atu halo tuir, neebe sura husi loron inspesaun, fo tempu ba loja nain hodi hadia kondisaun armanajenamentu neebe ekipa husik hela ba loja nain atu hadia no bainhira prontu ona, Ekipa AIFAESA sei tun fali atu halo verifikasaun, nunee bele loke fali hodi kontinua faan.
“Sasan balun mos ami detekta iha loja sira nee, hanesan masin midar balun laiha informasaun kona ba data espira, tanba nee ita konsidera hanesan irregularidade ida. Ida mos produtu alimentar ho non alimentar, sira tau hamutuk deit iha fatin ida, ladun ijiene, pior liu tan mak fatin la propriadu, tanba nee ita foti desizaun taka provizoriu atu nain ba loja sira nee hadia kondisaun sira nee, tanba ita husik hela rekomendasaun neebe ekipa konjuntu detekta,” dehan nia.
Nia haktuir tan katak, husi kazu nee, loja tolu komete infrasaun makaas, entaun tenki taka provizoriu no loja 6 seluk sei aplika sansaun administrasaun hodi selu koema, tanba la priense rekezitus hanesan falta ijiene, faan sasan liu prazu, neebe aplika sansaun nee bazeia ba nivel irregularidade.
“Bazeia ba ita nia dekreitu lei jeral No. 43/2023, ida nee sansaun administrativu neebe mak aplika koema no koema neebe sira selu bazeia ba iregularidade neebe iha sira komete irregularidade, neebe sansaun administrasaun selu koima husi montante kiik liu maka US$ 250 no boot liu maka US$ 75.000 ida nee komete irregularidade boot liu mak ida nee, maibe husi antes aplika selu koima nee, parte juridiku sei tetu fila fali husi gravidade infrasaun neebe loja nain sira komete,” afirma nia.
Nia dehan, AIFAESA lideradu husi Inspetora Jeral Doutora, Odete Viegas da Silva hanesa Dotora espesialista ida iha TL, tanba nee husu ba loja nain sira atu kumpri regras, liu-liu kona-ba saude nian.
“Husu ba loja nain atu kumpri regras, tanba ita faan sasan neebe espiradu ona nee, ninia impaktu laos ohin loron haan hetan ketan, maibe lori tempu naruk mak afeta ba ema nia saude, tanba nee ita nia Senhora Inspetora Jeral sempre tau importansia ba saude, atu ita nia estabelesimentu hotu-hotu, kumpri regras neebe maka iha nomos ijiene, tuir padraun neebe maka AIFAESA iha, tanba nee AIFAESA kontinua ninia papel hodi halo inpesaun no fiskalizasaun ba loja hotu iha TL laran tomak, atu garante saude publiku ba ema hotu-hotu ba ita nia komunidade sira, nunee salvaguarda ita nia povu iha nasaun ida nee, para ita moris iha kondisaun ida neebe mak saudavel, inklui mos direitu ba ita nia konsumedores sira neebe hatuur ona iha ita nia konstitusaun RDTL,” dehan nia.
Nia haktuir tan katak, AIFAESA nafatin firme hodi proteje direitu ba ema hotu-hotu no kontinua proteje komunidade nia saude iha nasaun TL.
(jos)
