BAUKAU, STLTIMORLESTE.com – Kompanhia Chongqing Internasional Construction neebe Governu liu husi Ministeriu Obras Publikas (MOP) kontratu hodi reabilita estrada diresaun Kelikai-Ossu, estraga sitiu istoriku ida iha Postu Administrativu Kelikai, Munisipiu Baukau.
Administrador Postu Administrativu Kelikai, Paul Jacinto Moreira haktuir, hafoin kompanhia liu husi trabalhador hahu servisu iha terenu halo limpeza ba estrada husi Aldeia Mumana, Suku Abafala, parte veteranus Autoridade Postu, Suku no intelektual fo hanoin ba kompanhia atu respeita monumentu istoriku neebe eziste iha Mumana, maibe parte kompanhia sobu, tanba razaun haluan estrada hodi aselera progresu reabilitasaun.
“Monumen nee estabelese iha tinan 1997 akontese iha neeba, maibe kompanhia estagus sobu soe tiha ba rai naruk kuaze 300 meter hanesan nee,” hateten Paul Jacinto Moreira ba jornalista STL iha Vila Nova, Baukau, Sesta (25/04/2025).
Nia esplika, sitiu istoriku neebe kompanhia estragus lokaliza iha Aldeia Mumana, Suku Abafala, neebe estabelese husi okupasaun Indonezia hafoin FALINTIL sira asalatu Forsa Indonezia sira ho karreta Hino konsege haraun no hamate Forsa Indonezia barak iha tinan 1997.
Nia fundamenta, hafoin trajedia nee akontese, povu Timor Leste barak mak sai vitima no hetan torturasaun, tanba Forsa Indonezia barak mak mate husi asaltu FALINTIL nian iha area Mumana.
Nunee iha tempu Timor ukun aan, parte veteranu, Autoridade Postu, Suku no intelektual sira iha Postu Kelikai hakarak atu prezerva hodi sai momentu istoriku ida husi prosesu luta libertasaun nian, neebe bele hatudu ba jerasaun foun sira iha Timor Leste no ema estrajeiru, tanba lokaliza iha estrada publiku, maibe hetan ona estragus husi kompanhia.
“Kelikai oan nia hakarak atu foti fila fali karreta nee tau iha nia fatin no konstrui fali monumen nee para ema liu karik bele hatene uluk 1997 akontese iha Kelikai nee,” Paul Jacinto Moreira akresenta.
Husi estragus neebe iha, parte Autoridade Postu hamutuk ho entidades sira iha fulan Agostu 2024, relata ona pedidu emerjensia ba Ministeiru Obras Publikas atu fo atensaun ba kompanhia Chongqing Internasional Constraction hodi estabelese hikas karreta Hino husi Forsa Indonezia neebe kompanhia suru soe ba rai naruk metru 300, maibe too ohin loron seidauk estabelese hikas.
Tanba nee husu Ministeriu Obras Publikas atu konsidera pedidu neebe diriji ona no fo hanoin ba kompanhia hodi estabelese hikas, nunee futuru jerasaun foun sira bele hatene trajedia sira neebe akontese iha pasadu.
(tom)
