ENILALE, STLTIMORLESTE.com – Kompanhia internasional Cobec 02 neebe responsabiliza projetu reabilita estrada diresaun husi kruzamentu Veninale too ponte Aslaitula la kumpri promesa ba fatuk nain iha Aldeia Uaitobonu, Suku Fatulia, Postu Administrativu Venilale, Munisipiu Baukau.
Xefe Aldeia Uaitobonu, José Ximenes haktuir, hafoin implementasaun projetu reabilitasaun estrada diresaun husi kruzamentu Suku Fatulia, Postu Venilale too iha area ponte Aslaitula, parte kompanhia internasional ho naran Cobec 02 halo aprosimasaun ho Xefe Aldeia Uaitobonu atu foti fatuk husi komunidade Alexo Ximenes nia kintal laran no hanesan autoridade Aldeia la aseita, tanba seidauk hetan autorizasaun husi nain ba kintal (Alexo Ximenes).
Maibe hafoin koordenasaun lao no hetan aseitasaun husi parte rua neebe tuir planu bainhira foti fatuk iha kintal laran hodi finaliza projetu reabilita estrada refere, kompanhia sei kee bee posu ida no konstrui tanki bee ida hodi fasilita komunidade sira, maibe hafoin projetu remata kompanhia lakon paradeiru no husik hela pezadu silindru kiik ida iha terenu.
“Sira sai husi nee, hodi bainhira dader sira mai lori sira nia makina ida iha nee mak hau dehan labele, neebe silindru kiik oan ida para hela, hau sente la dun diak neebe hau hateten ba sira loloos karik mai responde tiha lai. Silindru nee ami tahan deit la prende ema nia sasan, sira tenke mai responde preokupasaun nee,” hateten José Ximenes ba jornalista sira iha Uaitobonu Fatulia, Kuarta (23/07/2025).
Xefe Aldeia nee sublina, pezadu hanesan silindru kiik refere, la objetivu atu prende, maibe asegura deit no bainhira parte kompanhia responsabiliza ba akordu neebe iha prontu entrega hikas.
Tanba nia fundamenta, durante tula fatuk hodi implementa projetu refere, fatuk neebe parte kompanhia foti husi kintal Alexo Ximenes pur-volta kibiku rihun 3.
Maibe akordu neebe iha parte kompanhia seidauk responde, nunee iha tinan 2024 parte Autoridade Suku Fatulia aprezenta ona preokupasaun refere ba gabinete Ministeriu Obras Publikas Nasional hodi solusiona, maibe seidauk iha resposta.
“Ami ba hasoru sira gabinete maibe la responde entaun ami autoridade asente la diak hakarak hatoo ba diresaun nunee buka took dala responde,” José Ximenes prepkupa.
Xefe Suku Fatulia, Angelino Moisés Pereira la menta tebes ba hahalok kompanhia refere, tanba la responde nesesidade komunidade nian tuir akordu neebe iha, nunee hanesan Autoridade Suku kontinua asegura no ezije direitu komunidade sira nian neebe parte kompanhia seidauk responde.
“Pozisaun mak nee ezije nafatin maske projetu nee remata ona maibe tenke iha responsabilidade ba fatuk nain,” hateten Angelino
Xefe Suku nee deklara, kona-ba pezadu husi kompanhia Cobec 02 neebe dadaun para hela iha Uaitobonu, Autoridade la prende, tanba parte kompanhia hafoin remata projetu refere husik hela pezadu silindru kiik refere iha fatin tula fatuk, nunee autoridade Suku no Aldeia asegura no hein responsabilidade husi kompanhia atu konstrui tanki bee ida no kee bee posu ida iha suku Fatulia hafoin autoridade Suku entrega hikas pezadu refere.
Enkuantu too notisia nee publika STL seidauk hetan konfirmasaun husi kompanhia Cobec 02, tanba baze kompanhia refere iha Postu Venilale sobu ona hafoin projetu reabilita estrada finaliza.
Entretantu fatuk neebe parte kompanhia Cobec 02 tula husi kintal Alexo Ximenes iha tinan 2022.
(tom)
