AMBENO, STLTIMORLESTE.com – Autoridade Suku Bobocase Triste, Kompanhia Dijuju abandona ninia projetu konstrusaun Eskola Pre-Eskolar neebe lokaliza iha Paineno, Suku Bobokase, Aldeia Faotbijae kuaze tinan 2 ona.
Kestaun nee levanta husi Xefe Suku Bobocase, Tomas Nesi ba STL iha ninia servisu fatin Sede Suku Bobokase, Kuarta (20/08/2025) katak, nuudar Autoridade Suku Bobokase, sentre triste tanba kompanhia Dizuzu abandona projetu nee kuaze tinan 2 ona.
“Hau husu ba Diretor Kompanhia Dizuzu neebe mak abandona projetu nee atu finaliza lalais, se lae hau sei hakerek karta ida ba Governu autoridade Rejiaun Administrativa Oekusi-Ambeno (RAEOA), atu dada fali projetu nee no entrega ba kompanhia seluk hodi finaliza, nunee bele fasilita prosesu aprendijazen, tanba konstrusaun pre-eskolar nee atu atende programa governu daudaun nee, hodi hakbesik edukasaun iha area rurais. Hau sente triste, tanba projeitu nee mai husi programa VIII Governu Konstitusional neebe lidera husi eis Primeiru Ministru (PM), Taur Matan Ruak no Autoridade RAEOA lidera husi Arsenio Paixao Bano, projeitu nee ate ohin loron tinan 2025 ona sedauk finaliza,” dehan nia.
Relasiona ho preokupasaun nee, media STL konfirma Diretor Kompanhia Dezuzu, Antonio Abi rejeita informasaun kona-ba abandona ninia projeitu konstrusaun Eskola Pre-Eskolar iha Paineno.
“Hau daudaun nee iha hau nia projetu iha Paineno hodi finaliza projetu Eskola Pre-Eskolar nee, daudaun projeitu nee finaliza 100% ona, falta deit mak tanki bee mak cor daudaun ona, neebe hau hanesan nain ba projetu Eskola Pre-Eskolar Paineno rejeita informasaun neebe levanta husi Xefe Suku Bobocase,” dehan Diretor Kompanhia Dizuzu, Antonio Abi.
Bainhira konfirma liu husi telefone kona-ba projetu nee manan ho montante orsamentu hira no kompanhia naran saida, Diretor Kompanhia hamate kedan ninia numeru telefone, no kontinua koko telefone tan maibe la konsege foti telefone.
Tuir informasaun neebe STL asesu katak projetu konstrusaun Pre-Eskolar Paineno nee ho valor orsamentu US$ 94.989,29 no projetu nee konstrui iha tinan 2023, projetu nee lolos finaliza iha tinan 2024, maibe projetu nee too ohin loron seidauk finaliza.
(jos)
