BAUKAU, STLTIMORLESTE.com – Kompanhia lokal rua hanesan Mexa no Jatono Unipessoal.Lda abandona projetu reabilitasaun estrada rural iha Postu Administrativu Kelikai, Munisipiu Baukau.
Administrador Postu Kelikai, Paul Jacinto Moreira esplika, kompanhia rua refere Ministeriu Obras Publikas kontratu iha tinan 2023, neebe kompanhia Mexa Unipessoal.Lda responsabiliza reabilita estrada rural husi Postu Kelikai ba Suku Lakuliu no Jatono Unipessoal.Lda responsavel husi Ossolia too Abolir, maibe too ohin loron seidauk finaliza, tanba abandona servisu iha terenu.
“Ami rona katak kompanhia Mexa nee kaer tan obra ida iha Samalaria, maibe obra iha nee (Lakuliu) seidauk hotu, ida mos kompanhia Jatono mos ate agora seidauk hotu no Kompanhia nee (Jatono) lakon tiha ba neebe,” hateten Paul ba jornalista sira iha Kelikai, Domingu (18/05/2025).
Nia sublina, projetu reabilitasaun estrada rural husi Postu Kelikai too Suku Lakuliu kilometru 2 no husi Ossolia too Abolir kilometru 2, neebe kada kompanhia responsabiliza ba kilometru 2 hodi implementa servisu reabilita estrada rural ho tipu ateru no cor atu responde no fasilita movimentu transporte, maibe parte kompanhia seidauk finaliza projetu refere no konsdisaun seluk hatudu, reabilitasaun ba estrada neebe iha dadaun hahu aat.
Nia fundamenta, tuir kontratu neebe Ministeriu selebra ho parte kompanhia, implementa iha tinan 2023 no remata iha tinan 2024, maibe progresu fiziku seidauk finaliza no kondisaun estrada hahu aat, tanba nee parte Autoridade Postu relata ona pedidu ba Ministeriu Obras Publikas hodi fo solusaun.
“Husu ba Ministeriu Obras Publikas se kuandu kompanhia iha ona terenu kaer obra ida labele fo tan obra seluk atu nunee labele preojudika ba obra neebe iha ona,” Paul rekomenda.
Autoridade Postu nee husu Ministeriu Obras Publikas labele fo kontratu ba kompanhia ida ho projetu 2 iha fatin difirente, tanba bele fo impaktu ba projetu ida tenke abandona.
(tom)
