BAUKAU, STLTIMORLESTE.com – Diresaun Munisipal Transporte no Komunikasaun (DMTC – sigla português) Munisipiu Baukau deklara, kompanhia neebe ezekuta projetu reabilitasaun estrada diresaun husi area Waisa, Suku Tirilolo, Postu Administrativu Baukau Vila too iha area Aeroportu Lanud Baukau, monta sinais tranzitu la kompletu.
Diretor Diresaun Munisipal Transporte no Komunikasaun Munisipiu Baukau, Manuel Pinto da Costa hateten, DMTC Munisipiu Baukau halo ona observasaun ba estabelese sinais tranzitu iha estrada foun, diresaun husi area Waisa, Suku Tirilolo, Postu Administrativu Baukau Vila too iha area Lanud neebe inagura ona foin lalais nee, parte kompanhia monta ona sinais tranzitu iha estrada ninin atu fo atensaun ba motorista sira, maibe sinais tranzitu neebe parte kompanhia monta iha estrada refere seidauk kompletu iha fatin risku sira, tanba iha parte kurva sira estabelese sinais tranzitu ida.
“Estrada husi Uaiono Waisa mai too Lanud nee ami haree katak seidauk kompletu, sinais neebe tau husi kompanhia manan tender sira tau distansia dook malu liu, iha parte balu sinais balu seidauk iha liu liu mak kurva maten sira nee sinais seidauk kompletu,” hateten Diretor DMTC Baukau, Manuel Pinto da Costa ba STL iha nia knaar fatin Uatelete Baukau, Kinta (26/02/2026).
Nia sublina, husi sinais tranzitu neebe parte kompanhia mota iha estrada refere hanesan iha parte kurva sira, tuir loloos parte kompanhia monta tuituir malu ho distansia neebe besik, nunee fo atensaun ba motorista sira, maibe realidade parte kompanhia la monta ho kompletu, nunee la fo atensaun masimu ba motorista sira too mosu ona asidente trafiku kuaze dala 2 iha estrada refere, neebe rezulta sidadaun balu lakon vida no kanek grave.
Nia komenta, sinais tranzitu neebe mota iha estrada refere, antes atu monta sinais tranzitu iha estrada refere, parte Diresaun Munisipal Transporte no Komunikasaun Baukau aprosima ona Servisu Munisipal Obras Publikas Baukau atu halo koordenasaun ho DMTC nunee monta iha fatin tarjetu sira, maibe parte kompanhia nonok hodi monta mesak sinais tranzitu iha estrada refere ho la kompletu.
“Loloos nee kompanhia koordena ami bainhira tau sinais tranzitu tenke koordena ho ami para ita tau sinais nee tenke tau duni iha identifika, tanba kompanhia tau nee lakompletu entaun ida nee mos bele prejudika ita nia transporte sira neebe halo movimentu iha neeba,” Manuel akresenta.
Diretor DMTC Baukau nee argumentu, relasiona sinais tranzitu neebe parte kompanhia monta iha estrada refere sedauk kompletu, Dirasaun Munisipal Transporte no Komunikasaun hatoo ona ba Dirasaun Nasional Transporte Terrestre atu kompleta sinais tranzitu iha estrada refere hodi nunee la prejudika transporte publiku no privadu nia movimentasaun.
Enkuantu liga asuntu nee STL tenta komfirma ho parte kompanhia neebe uluk responsabiliza ba projetu estrada foun no monta sinais tranzitu refere, maibe sedauk fo komentariu.
Entretantu prejetu estrada foun refere responsabiliza husi kompanhia lokal rua mak hanesan DVP Construsaun Unipesoal Lda responsabiliza Km 5 ho total orsamentu millaun US$ 4,386,542.91 no Kompanhia Central Hill Unipessoal Lda responsabiliza ba Km 3.240 ho total orsamentu milaun US$ 2,537,086 ba durasaun tempu servisu fulan 12 neebe inagura husi Primeiru Ministru Kay Rala Xanana Gusmão iha loron 10 Janeiru tinan nee.
(tom)
