BAUKAU, STLTIMORLESTE.com – Deskonfia kompanhia fornesedor neebe Programa Nasional Dezenvolvimentu Suku (PNDS) Munisipiu Baukau koordena hodi implementa projetu perfurasaun bee iha Suku Buibau, Postu Administrativu Baukau Vila, daudaun nee abandona.
Xefe Suku Buibau, Francisco Ximenes esplika, projetu perfurasaun bee iha Suku Buibau ho valor orsamentu rihun US$ 21 neebe implementa liu husi fasilitador PNDS Postu no Munisipiu mak halo koordenasaun ho parte kompanhia fornesedor Xineza Wiziwei ba durasaun tinan ida neebe tuir planu finaliza iha tinan 2024, maibe too ohin loron seidauk remata, tanba parte kompanhia fornesedor abandona projetu refere mezmu halo ona pagamentu 100%.
“Fornesedor Wiziwei PNDS Postu ho Munisipiu mak koordena, ami la ba direita tanba osan boot fasilitador PNDS Postu Munisipiu sira nee mak hasoru malu implementa projetu ida nee abandona,” hateten Francisco ba jornalista STL iha Buibau, Segunda (14/07/2025).
Nia sublina, perfurasaun refere atu hatan ba nesesidade komunidade sira nian iha Suku Buibau kona-ba preokupasaun bee moos nian, tanba durante nee enfrenta problema bee moos, maibe parte kompanhia fornesedor abandona projetu refere.
Nunee Autoridade Suku Buibau sei halo keixa iha PNDS Munisipiu Baukau hodi prosesu kazu refere, tanba informasaun neebe parte Suku simu husi Prezidente KPA PNDS Suku Buibau, kompanhia foti ona osan 100% husi projetu refere.
“Prezidente KPA PNDS koalia dehan foti hotu ona, hau tenke hasoru PNDS Munisipiu para prosesa sira, tanba abandona servisu ita haree nia laiha responsabilidade,” Francisco akresenta.
Liga asuntu nee, STL tenta konfirma Diretor PNDS Munisipiu Baukau maibe laiha fatin atu fo komentariu, tanba sei halao hela atividade iha fatin seluk.
(tom)
