BAUKAU, STLTIMORLESTE.com – Kompanhia Norinco seidauk konstrui ponte foun hodi subtitui ponte Gomilafa neebe lokaliza iha Suku Atelari, Postu Administrativu Laga, Munisipiu Baukau, tanba kestaun kultura.
Administrador Postu Administrativu Laga, João de Castro Freitas esplika, ponte Gomilafa hahu konstrui iha tempu Indonezia neebe durante tinan naruk, fasilita ona movimentasaun komunidade sira ho transporte publiku no privadu husi Postu Administrativu Baguia ba Baukau Vila no husi Baukau Vila ba Postu Administrativu Baguia inklui mos fo asesu ba komunidade sira husi Suku Atelari, Postu Administrativu Laga, maibe daudaun kondisaun aat no difikulta transporte publiku no privadu, maibe parte kompanhia responsabiliza projetu reabilitasaun estrada diresaun Laga-Baguia, seidauk konstrui ponte foun hodi substitui ponte Gomilafa, tanba kestaun kultural.
“Tuir informasaun neebe ami simu husi Autoridade Suku katak, iha ponte ida nee kompanhia seidauk bele halo tanba liga mos ba asuntu kultura iha neeba, tanba nee ami husu Autoridade Konselhu Suku, atu nunee ita bele servisu hamutuk buka took meius ida oinsa mak bele fo dalan problema ida nee,” João hateten ba STL, iha Vila Nova,Baukau, Sesta (12/12/2025).
Tuir Autoridade Postu Laga nee katak, atu konstuir ponte foun hodi subtitui ponte Gomilafa prezisa Autoridade Suku Atelari nia koopetasaun servisu hamutuk ho Autoridade Postu no kompanhia responsabilidade ba projetu reabilitasaun estrada diresaun Laga-Baguia, nunee bele realiza seremonia kultural hodi hahu konstrusaun ba ponte foun.
Tanba bainhira la halo seremonia ritual parte kompanhia sei la konstrui ponte refere no futuru mai, sei difikulta liu tan movimentasaun transporte publiku no privadu diresaun Laga-Baguia, tanba daudaun kondisaun ponte refere hahu aat ona.
Liga asuntu nee, STL tenta konfirma Autoridade Suku Atelari liu husi via telefone, maibe la atende.
Entretantu tuir observasaun Jornalista STL nian iha terrenu nota katak, projetu reabilitasaun estrada diresaun Laga-Baguia neebe responsabiliza husi kompanhia internasional Norinco, durante servisu progresu nahe alkatraun husi Laga Vila too ona area Teloidae no progresu seluk hanesan preparasaun ba nahe alkatraun kontinua lao iha terrenu,enkuantu iha area ponte Gomilafa nian parte kompanhia seidauk halo limpeza hodi kontinua implementa servisu sira.
No observasaun seluk neebe STL hetan iha ponte Gomilafa, asesoria hanesan besi neebe estabelese iha ponte ninin kuaze monu ona, tanba feruzin, no daudaun nee transporte publiku no privadu diresaun Laga-Baguia kontinua utiliza ponte refere, tanba laiha dalan alternativu.
Jornalista: Tomas Reis
Editora: Carme Ximenes
