BAUKAU, STLTIMORLESTE.com – Kompanhia Norinco International Cooperation neebe jere projetu reabilitasaun estrada Laga-Baguia, Prezidente Autoridade Munisipiu Baukau, Veneranda Lemos konsidera servisu lentu, tanba nee informa ona ba Ministeriu Obras Publikas (MOP) hodi fo atensaun.
“Kompanhia neebe ezekuta estrada Laga-Baguia lentu loos, horiseik hau informa ona ba Sr. Ministru Obras Publikas, hau dehan favor ida husu responsabilidade ba kompanhia Xina nee,” hateten Veneranda Lemos ba jornalista STL iha Vila Nova, Baukau, Kuarta nee (07/05/2025).
Tuir Veneranda katak, lo-loos projetu reabilitasaun estrada Laga-Baguia hotu ona, tanba tuir kontratu durasaun servisu fulan 18, maibe liu ona kontratu servisu fulan 18 kontinua seidauk remata.
Nia sublina, Kompanhia Norinco nia servisu ladun diak, tanba ezekuta obra la hanesan kompanhia internasional seluk iha Timor Leste, komparasaun Norinco nia servisu ho komapanhia Timoroan nian neebe implementa projetu reabilita estrada iha Baukau, liga husi Kairavela too Aeroportu Baukau no Loilubu ba Venilale movimentu transporte lao diak, maibe projetu reabilita estrada Laga-Baguia la hanesan.
Aleinde nee mos Kompanhia Norinco laiha responsabilidade ba kuak sira neebe kee hela iha estrada sira, tanba kauza bee naliun difikulta movimentu transporte hanesan motorizada.
“Hau simu informasaun husi Xefe Suku Alaua ho fotografia ema hiit deit motorizada iha parte Atelari nian, tanba bee naliun boot, ida nee labele, tanba laiha responsabilidade, nunee nasional tenke tau responsabilidade ba kestaun ida nee,” Veneranda hakotu.
(tom)
