DILI, STLTIMORLESTE.com – Komisaun F Parlamentu Nasional (PN) neebe trata asuntu Saude, Seguransa Sosial no Igualdade Jeneru iha PN husu ba Kompanhia China Civil Engineer Contruction Cooperation (CCECC ) neebe halao hela konstrusaun pediatria ho andar lima inklui Unidade Kuidadu Intensivu Kardiolojia (ICCU) tenke aselera lalais, tanba konstrusaun nee uza OJE 2024 nian neebe reapropria ba mai iha OJE ba 2025 nian.
Presidente Komisaun F, Parlamentu Nasional (PN) , Maria Gorumali Barreto dehan, fiskalizasaun Komisaun F nian mai iha Hospital Nasional Guido Valadares (HNGV) atu haree liu ba diresaun neebe mak importante, mak hanesan konstrusaun hirak neebe lao hela, nomos ba OJE 2024 nian neebe reapropria ba mai iha OJE ba 2025 nian.
“Ami sei ezije nafatin ba kompanhia para aselera sira nia servisu, atu nunee bele responde ba sira nia promesa neebe mak iha,” hatete Maria Gorumali Barreto ba jornalista sira iha HNGV Bidau, Dili, Kinta (23/1/2025).
Nia hatutan, papel Komisuan F nian mak atu haree tuir konstrusaun nee lao tuir BOQ ga lae, depois promesa sira neebe sira hatete nee tuir duni ga lae, tanba kontrusaun nia orsamentu nee reapropria husi tinan hira kedas mak foin halo konstrusaun iha tinan 2024 no 2025.
Nunee Komisuan F mos halo vizita ba iha konstrusaun hirak neebe agora lao daudaun iha HNGV no liu ba konstrusaun uma andar lima neebe haree liu ba konstrusaun pediatria nian.
“Ita haree konstrusaun pediatria nee antiji ona 31.8%, maibe sira nia konstrusaun nee hahu lo-loos nee iha fulan Fevereiru 2024, mais problema ho lei aprovizionamentu nomos sei halo teste ba material konstrusaun nian ho laboratoriu, ida nee mak lori tempu, tanba nee mak foin atinji hanesan hau fo hatene nee,” nia esplika.
Nia informa, tuir promesa neebe kompanhia hatoo nee sira halo konstrusaun sei remata iha fulan Julhu 2025, konstrusaun remata sei entrega ba governu.
Antes nee Diretora Administrasaun Finansa no Lojistika iha HNGV, Sara Maria deklara, konstrusaun pediatria andar lima (5) no ICCU Hospital Nasional Guido Valadares nia orsamentu hamutuk US$ 9,341,663.70.
“Osan kontrusaun pediatria andar 5 no ICCU HNGV orsamentu hamutuk US$ 9,341,663.70,” dehan nia.
Nia afirma, kontrusaun sei lao hela, tanba nee hotu-hotu hein, atu wainhira hotu bele rezolve ona espasu iha HNGV, tanba konstrusaun nee durante tinan 2 hahu husi 2023 too mai 2025.
(jen)
