DILI, STLTIMORLESTE.com – FALINTIL – Forsa Defeza Timor Leste (F-FDTL) Komponente Naval prende sasan kontra bandu hanesan fugetes kaixa 50 iha Munisipiu Likisa, no entrega ona ba Komando Polisia Nasional Timor Leste, Departamentu Investigasaun Kriminal Nasional hodi halo prosesu.
Xefe Departamentu Investigasaun Kriminal Nasional, Superientidente Polisia João Belo dos Reis hatete, ohin dader hakarak informa ba maluk sira hotu katak, horseik tuku 16:30 ekipa husi komponente naval F-FDTL nian entrega objetus aprendidus neebe mak sira prende iha parte Likisa.
“Objetus aprendidus sira nee kompostu husi fugetes kaixa 50, neebe iha kaixa 50 nia laran kompostu husi fugetes ho marka IF 0201 smoke 3 kaixa 32, ida fali fugetes ho marka IF 0201 smoke 2 hamutuk kaixa 5, no mos fugetes marka W 3013T happy flower hamutuk kaixa 13,” dehan nia ba jornalista sira liu husi Konfrensia Imprensa iha Komando Jeral PNTL, Kaikoli, Kuarta (16/10/2024).
Nia dehan, agora daudaun Departamentu Investigasaun Kriminal Nasional halo hela investigasaun atu identifika autor sira neebe halo transaksaun atividades ilegal husi tasi, neebe maluk sira husi F-FDTL prende horiseik.
“Ami Polisia Nasional Timor Leste sei servisu hamutuk nafatin ho parseriu sira hodi halo operasaun ba sasan sira neebe mak kontra bandu, neebe mak tama liu husi tasi nomos rai maran, tanba sira la kontribui selu taxa ba estadu nomos sira desviza husi kontrolamentu autoridade serguransa,” dehan nia.
Nia akresenta, sira mos identifika autor ida neebe mak fasilita sasan nee tama mai, autor nee insial AFL husi Munisipiu Likisa.
Sasan sira nee sei halo tiha identifikasaun no sei submete ba Ministeriu Publiku ohin, suspeitu horiseik halo identifikasaun no haruka fila, no PNTL sei kontinua halo identifikasaun ba autor seluk neebe mak involve kazu kontra bandu nee.
(mar)
