DILI, STLTIMORLESTE.com – Politika Governu liu husi Sekretariu Estadu Asuntu Toponomia no Organizasaun Urbana (SEATOU) neebe halo eviksaun ba komunidade sira iha Bidau Akadiru-hun, nain 197 durante nee seidauk hetan Indemnizasaun.
“Hau nia komunidade neebe durante hetan evikasaun, daudaun nee seidauk identifika didiak sira nia paradeiru, maibe haree katak komunidade balun ba mak hela iha foho leten, no balun desidi atu ba foho, maibe hein hela governu atu selu sira nia direitu,” dehan Xefe suku Akadiru-hun, Juvinal da Conceição ba STL iha sede-suku Akadiru Hun, Kuarta (23/10/2024).
Nia dehan, komunidade sira neebe durante nee hetan evikasaun husi Governu, sira mos mai ezije, atu husu ba Governu hodi selu, maibe too agora Governu seidauk selu direitu komunidade nian.
Tanba komunidade kuaze nain 197 Governu duni, maibe laiha kondisaun neebe dignu, tanba nee hanesan autoridadel lokal, reprezenta povu nia naran, husu ba Governu liu-liu parte kompetente sira atu selu komunidade sira neebe durante nee seidauk hetan nia direitu, nunee sira bele utiliza fali ba rezidensia seluk.
“Hau durante nee seidauk iha dadus atual ba komunidade iha Bidau Akadiru-hun, neebe durante hasoru hela situasaun ba evikasaun nian no durante nee sira balun nia paradeiru laiha, balun hela iha foho leten, tanba deit Governu seidauk halo Indemnizasaun,” hatete Xefe Suku nee.
Xefe Suku nee hatutan, komunidade sira sempre mai husu atu Governu bele selu ba nia direitu, neebe durante nee seidauk selu ba sira nia diretu, Governu tenke selu ona, nunee komunidade idak-idak bele ba halo nia mahon fatin atu hela, nunee bele normaliza fila-fali prosesu estudu sira ba nia oan sira.
Tanba nee Governu tenki halo Indemnizasaun ba komunidade sira neebe durante nee seidauk hetan nia direitu, liu-liu komunidade iha suku Bidau Akadiru Hun, nunee bele kondisiona komunidade sira, hodi halo sira nia rezidensia foun atu hela no moris ho dignu.
Iha fatin seluk, komunidade husi Suku Bidau Akadiru-hun, Florensia dos Santos hatete, durante nee Governu seidauk selu ba komunidade sira neebe hetan eviksaun, tanba hasai no duni deit, maibe laiha kondisaun ida atu fo hodi hela.
Tanba nee hanesan komunidade husu ba Governu kompetente sira, atu kria kondisaun dignu ba komunidade sira, nunee bele ajuda no fo kbiit hodi halo fali uma atu hela.
(EST 1)
