DILI, STLTIMORLESTE.com – Komunidade husi Aldeia Likarapoma, Suku Bairo Pite, Postu Administrativu Dom Aleixo, MunisÃpiu Dili, balun too agora sei kontinua konsumu bee posu.
Lia hirak nee hatoo husi komunidade Suku Bairo Pite, Satornina Fernandes Sarmento ba STL, Kuarta nee (04/03/2026).
“Iha Aldeia Likarapoma, Suku Bairo Pite, ita nian komunidade balun too agora sei kontinua konsumu bee posu, nee tinan barak nia laran ona, laos foin mak uza bee posu ida nee, tanba komunidade sira uza bee posu ba haris, tein, fase ropa. Durante nee ami uza deit bee posu, nee bainhira udan, bee posu nee moos los, nakonu no malirin,” nia esplika.
Satornina dehan, komunidade laos hotu-hotu mak uza bee posu lae, maibe balun deit mak too agora sei uza bee posu, iha komunidade balun hahu fura rasik sira nian bee nomos balun mak sei uza bee posu.
“Bee posu neebe mak komunidade sira uza nee kee rasik, depois kada semana ou fulan ami tenke hamoos para hamenus bee ten iha bee posu laran, tempu bailoron ami nunka susar bee moos, tanba ami nian bee posu nee la maran, maske iha fatin balun ita nian komunidade sira sempre halerik ba bee moos, maibe ami kada tinan la susar ba bee moos,” tenik nia.
Tuir observasaun STL iha terenu katak, bee posu neebe komunidade sira konsumu nee iha tempu udan bee refere nakonu no moos, tinan barak ona komunidade balun too agora sei kontinua konsumu bee posu nee.
(jac)
