LAUTÉM, STLTIMORLESTE.com – Komunidade area remotas preokupa ho folin foos neebe serkula iha merkadu no loja sira, tanba faan karun.
Ami sente triste no preokupa tebes ba foos folin sae iha loja sira neebe iha area remotas sira, tanba saku 25kg ho presu US$ 19.50, bele dehan US$ 20, ami kbiit la too atu sosa,” dehan Komunidade iha Suku Bauro, Aldeia Bauro, Ernestina de Sousa ba STL, Domingu (05/01/2025).
Tanba tuir nia, folin foos karun halo komunidade sira preokupa, tanba produtu foos ida nee sai hanesan nesesidade diaria neebe ema maioria depedensia ba ai-haan baziku nian, maibe ho folin neebe karun, ema neebe iha kbiit mak bele sosa, no balu neebe laiha forsa finanseiru sei laiha hahan.
Komunidade neebe laiha kbiit atu sosa foos mak ho kreatividade ba buka produtu lokal sira, hanesan ai farina, fehuk, talas, kumbili, no ai han sira seluk hodi mai sustenta fali ba oan sira nia kabun, dala ruma mai faan fali, hetan osan, sosa fali ba foos sukat ba haan.
“Ami sente triste ho folin foos, tanba uluk saku 20kg presu sae liu mak US$ 15 , presu normal US$ 12.50 , no 25kg folin normal US$ 14 , kompara fali ho folin foos agora, 25kg too US$ 19.50 balun too US$ 20, entaun halo ami laiha kbiit no forsa atu sosa, hodi sustenta ba familia uma laran nian,” nia konta.
Iha parte seluk, Negosiante Adelio Lopes dehan, folin foos neebe faan iha loja no kios sira iha area remotas, faan tuir folin neebe sosa iha kompanhia sira, tanba sosa tutan husi kompanhia sira, depende kompanhia faan, kuandu sira hatun folin entaun loja sira mos sei hatun.
(EST 1)
