DILI, STLTIMORLESTE.com – Populasaun sira neebe hela iha Atauro maioria asesu ona ba linha eletrisidade, maibe eletrisidade lakan too deit tuku 12 kalan, maske komunidade sira uza ona prepagu.
Preokupasaun nee hatoo husi Xefe Suku Atauro, Adão da Costa Nunes ba jornalista STL liu husi telefone, Kuarta nee (23/07/2025).
Xefe Suku Beloi Adão da Costa Nunes hatete, preokupasaun nee halo komunidade sira barak iha Atauro preokupa tebes wainhira ahi lakan too deit tuku 12 kalan, nee bele estraga komunidade sira nia sasan no produtu sira.
“Ema hotu-hotu preokupa, maibe ida nee depende husi governu, maibe balun la satisfas tanba balun ahi lakan no balun la lakan, se ahi nee mak lakan too deit tuku 12 kalan, nee bele estraga komunidade sira nia sasan, tanba nee ami husu ba governu futuru atende ahi nee lakan too 24 oras, se ahi too deit tuku 12 kalan bele estraga komunidade sira nia sasan sira liu-liu peskador sira neebe mak faan ikan,” dehan Xefe Suku Adão.
Nia fundamenta, tuir lo-loos nee eletrisidade labele lakan too deit tuku 12 kalan, tanba ukun aan tinan 23 ona bele fasilita oan sira hodi estuda iha tempu kalan.
“Uluk nee lakan too 14 oras, maibe foin lalais husi Munisteriu Obras Publiku (MOP) mai lansa tan ona neebe aumenta tan ona ba 18 oras, agora ita halo preparasaun ami nia komunidade sira atu instala hodi reforsa tan EDTL ba 24 oras,” dehan Adão.
Nia tenik, komunidade sira asesu maibe hakarak atu lakan too 24 oras, maibe mina selu ba trasporte nee selu makaas los, maibe ANP mai iha terenu haree oinsa atu bele fornese mina mai husi Dili uza roo para labele gastu.
“Atu responde ba ida nee maibe problema mak mina nee karun, tanba aluga deit nee konta husi neeba mai ita prepara hodi asegura hodi fornese ba nia gastu nee menus oituan ,”nia hakotu.
Entretantu iha Suku Beloi total populasaun hamutuk 1.950 kompostu husi aldeia haat mak hanesan Aldeia Adara, Aldeia Arlo, Aldeia Maker no Bemasu.
(EST 1)
