DILI, STLTIMORLESTE.com – Ministru Obras Publika (MOP), Samuel Marcal hatete, Governu halo ona pagamentu ba komunidade balun neebe afeitadu ba alargamentu estrada husi Bekora too Bidau no balun iha hela prosesu nia laran.
Ministru Obras Publika, Samuel Marcal hatoo kestaun nee ba jornalista sira bainhira remata halo enkontru ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Sesta nee (13/02/2026).
Ministru Obras Publika hatete, kompensasaun ba komunidade neebe sai vitima ba alargamentu iha Bekora too Bidau Sengol balun selu ona no balun foin ministru asina.
“Balun selu ona no balun hau foin asina, depois foti tiha data sira nee hotu tenke halo fali krocek ho sira uma nain, bainhira sira konkorda hotu ona depois mak ita halo prosesu, neebe balun neebe uluk konkorda nee selu daudaun ona balun mak hahu prosesu, horiseik hau mos asina lubuk ida para hahu prosesu pagamentu,” dehan Ministru.
Total komunidade neebe simu ona pagamentu nee hira no ida seidauk simu iha prosesu nia laran nee hamutuk hira? Hatan ba kestaun nee Ministru hatete, numeru nee ministru ladun lembra hira mak halo ona pagamentu no hira mak sei prosesu, tanba balun nee kios no balun nee moru.
Aleinde oinsa ho lansamentu ba estrada rural sira, tanba munisipiu balun estrada sei grave tebes maibe tinan oin tama ona ba eleisaun munisipal, hatan ba kestaun nee Ministru rekonhese katak, estrada balun iha Timor laran balun grave tebes.
“Iha Timor laran estrada balun grave tebes, imi hotu akompanha hau koalia iha media katak inprinsipiu ita hotu hakarak buat nee lalais mais ita sukat ho ita nia kapasidade setor privadu, sukat mos ho ita nia kapasidade trabalhadores, sukat mos ho orsamentu estadu nian, ita labele hanoin halo buat hotu iha tinan 1 iha Timor laran hotu kedas ou tinan 2 hotu kedas,” katak nia.
Ida nee faze por faze, maibe tinan ida nee iha ona prosesu aprosinamentu quatru centos setenta quartu projetu neebe sei lansa tan, tinan kotuk lansa lubuk ida ona neebe kontrasaun lao ona tinan nee cento setenta quatro (174) projetu neebe mak iha prosesu aprosinamentu ba estrada rural, nia espera katak iha fulan ida rua mai tan bele asina ona kontratu, laos deit estrada maibe eletrisidade mos.
Ministru hatete, aban (14/02/2026) Governu sei lansa estrada urbana Ainaro, Aileu, Vikeke no ida neebe sei prosesu tuir mai mak Lospalos, Likisa, Suai no Same.
Aban urbana Ainaro nian depois iha Aileu, depois mai Vikeke, neebe dokumentus prontu ona, no ida neebe mak prosesu mai mak Lospalos, Likisa, Same no Suai.
Aleinde oinsa prosesu reablita estrada husi Lautem ba iha Postu Ilumar, hatan ba kestaun nee Ministru dehan, prosesu nee lao hela, no prosesu sira nee tama ona programa tinan 5 nian, espara iha tinan ida nia laran bele asina kontratu inklui mos ba Mehara nia nomos urbana iha Lospalos nian.
Aleinde nee konaba eletrisidade kuaze Timor laran tomak aldeia iha nivel too suku kuaze hotu ona no iha tinan 2025 konklui ona nivel suku hela deit 163 mak seidauk utiliza ahi eletrisidade, maibe prosesu iha ona konkursu, espera fulan ida ka rua bele asina kontratu.
Maibe iha Dili laran deit eletrsidade mate lakan, oinsa Ministru nia haree, hatan ba kestaun nee ministru hatete, se hadia estrada, sobu fiu ba mai mak la soke hanoin la presiza hamate, maibe se fiu nee mak ema sobu soke entaun presiza hamate.
(eme)
