BAUKAU, STLTIMORLESTE.com – Komunidade maioria iha Suku Buibau, Postu Administrativu Baukau Vila, Munisipiu Baukau, enfrenta problema bee moos, tanba lao distansia kilometru rua resin foin asesu bee matan.
Xefe Suku Buibau, Francisco Ximenes esplika, Suku Buibau kompostu Aldeia rua mak hanesan Aldeia Loidua’a no Buibau rejistu total uma kain 600 resin no uma kain 100 resin hetan ona kanalizasaun Bee Timor-Leste Empreza Publika (BTL,EP), enkuantu seluk seidauk, tanba razaun bee matan neebe BTL utiliza hodi fornese ba kliente sira iha Baukau Vila la sufisiente atu kobre hotu komunidade sira iha Suku Buibau.
Nunee obrigatoriu komunidade balun neebe iha finanseiru kada semana sosa bee husi bombeiru ho folin US$ 12.00 responde ba bee litru 5.000, maibe komunidade balun neebe laiha finanseiru kada loron lao ain ho distansia kilometru rua resin hafoin too bee matan Uaimori, Ta’antoi no bee matan Kaskairate hodi kuru utiliza ba nesesidade diaria.
“Iha nee loron-loron sira sosa bee kuaze tanki ida US$ 12.00, sira laiha kbiit nee dala ruma ba bee matan neebe besik, balun lao kilo ida, balun lao kilo rua mak foin too iha bee matan Uaimori, Ta’antoi no bee matan Kaskairate,” hateten Francisco ba jornalista sira iha Buibau, Sesta (11/07/2025).
Lideransa Suku Buibau nee konsidera, bee moos fator importante ba nesesidade umanu no seluk tan, maibe komunidade sira iha Suku Buibau obrigatoriu lao distansia dook hafoin asesu bee moos.
Nia fundamenta, hanesan Autoridade lokal kontinua esforsu no relata ba Munisipiu hodi enkaixa iha Planu Dezenvolvimentu Integradu Munisipal no Programa Nasional Dezenvolvimentu Suku atu responde, maibe laiha ezistensia bee matan permanente atu kanaliza ba komunidade sira.
Tanba nee nafatin husu Autoridade Bee Timor-Leste Empreza Publika hodi haree kestaun bee moos iha Suku Buibau, tanba parte balun asesu ona bee moos husi kanalizasaun BTL enkuantu balun seidauk.
Hatan ba kestuan nee, Koordenadora BTL,EP Munisipiu Baukau, Adriana Belo da Rosa hateten, rekomendasaun refere parte BTL sei responde komunidade Buibau nia preokupasaun kona-ba seidauk asesu bee moos husi kanalizasaun BTL nian, maibe tempu labele determina.
“Rekomendasaun ami simu, maibe bainhira mak atu halo hau labele fo data serteza, maibe rekomendasaun ami anota,” hateten Adriana.
Entretantu Suku Buibau rejistu populasaun hamutuk rihun tolu resin husi uma kain 600 resin iha Aldeia Loidua’a no Buibau.
(tom)
