DILI, STLTIMORLESTE.com – Komunidade iha Suku Com, Postu Administrativa Lautem, Munisipiu Lautem, durante tinan ida enfrenta problema bee moos, tanba bee neebe fornese husi SAS maran.
Komunidade Com, Olegário da Costa hatete, kompara ho tinan kotuk, ho tinan hirak liu ba, haree tinan ida nee aat liu, tanba haree ba rai manas loos no bee matan balu menus, no balu maran aat liu tan.
“Ami iha nee bee matan barak, maibe balu ami uza balu ami abandona, ida ami uza nee bee matan ida boot nee, maibe ida kiik nee iha tinan sira uluk la maran maibe agora maran, bee matan ida naran Tamikuru, Ira-masi kaa manu sira nee agora maran, bee matan boot sira nee menus entaun afeita ba Animal sira tenke halai hotu mai fali iha bee matan daudaun nee,” dehan Olegario ba jornalista sira iha Com, Lautem, Segunda (18/11/2024).
Nia dehan, haree bá ida nee mak impaktu, depois haree ba duut mos mate hotu, haree ba ai horis balu mos mate, tanba mundansa klimatika manas loos, se kompara ho tinan kotuk tanba uluk ita haree bá nia manas nee nia grau sersiu nee ladun, maibe agora daudaun sae too 35 grau sersiu.
Nia akresenta, iha area Com nee bee matan hira kedas, agora konsumu bee matan rua mak dada mai iha nee, entaun bee nee kuandu menus, entaun kompara ho tinan uluk udan diak entaun bee matan sira mos sufisiente no bee mai nafatin.
Tanba Jestaun ba bee nee loke oras ida, maibe dala ruma la too oras, maibe dala ruma diak nee dala ruma too loron ida, kuandu laiha nee too loron rua tolu mos bee la mai.
(mar)
