LAUTÉM, STLTIMORLESTE.com – Ho kondisaun no ekonomia ba nesesidade uma laran, komunidade husi Suku Com, Postu Administrativu Lautem, Munisipiu Lautem lori tasi sai nuudar toos boot ba moris.
Dehan komunidade iha Aldeia Vailovaia, Aderito dos Santos ba STL iha Suku Com, Segunda nee (18/11/2024).
“Kondisaun ba ekonomia familia, liu-liu sustenta ba nesesidade uma laran, komunidade iha Suku Com lori tasi mak sai hanesan baze fundamentu ida, hodi bele hetan osan, no uza sustenta uma laran no oan sira nia eskola,” dehan Aderito.
Nia dehan, lori tasi sai hanesan ekonomia potensial, tanba bele ba buka ika iha tasi laran, lori ikan mai hodi faan, hafoin hetan osan, sustena ba oan sira nia estudu no mos ba nesesidade diaria nian.
Tanba ikan neebe mak dala ruma ba buka iha tasi laran, ho objetivu ida atu foti ikan hodi mai faan, no hetan osan, sustenta ba uma laran, tanba iha Suku Com komunidade barak mak la halo toos, tanba impaktu husi mudansa klimatika, entaun udan laiha halo bailoron naruk.
Iha sorin seluk, Peskador Fabião da Cruz hatete, komunidade iha Suku Com, Postu Administrativu Lautém, Munisipiu Lautém, maioria dependensia nia moris iha tasi laran, lori tasi sai hanesan toos boot, buat kiik ka boot bazeia ba nesesidade tenke buka iha tasi laran, hanesan ba foti ika lori ba faan hetan osan, foti ikan lori ba halo modo hodi aguenta ba nesesidade uma laran.
Entretantu Alfredo Soares hatete, Komunidade iha Suku Com lori tasi sai fatin ekonomia uma laran, tanba loron-loron ba buka ikan hodi mai faan, tanba ho objetivu ida atu sustenta ba oan sira nia moris ka futuru nian.
“Tanba ekonomia potensal iha Suku Com laos ba natar, toos ka kantireiru, maibe tasi, ba buka ikan, mai faan, hetan ajuda ba oan sira nia nesesidade, nunee Konsidera katak tasi mak fo hahan ba oan sira, tasi mak fo forsa ba oan sira nia estudu, liu-liu buka ikan ba faan, hetan osan, hodi sustenta ba nesesidade uma laran nian,” nia sublina.
(EST 1)
