DILI, STLTIMORLESTE.com – Komunidade iha Munisipiu Ermera enfrenta moras malnutrisaun ho numeru 35%, tanba nee liu husi orientasaun Prezidente Autoridade Munisipiu Ermera (PAME) esforsu hodi hadia nutrisaun iha rai laran.
“Ita esforsu nafatin, konsege reduza ona moras malnutrisaun neebe afeta tebes ba komunidade, liu-liu labarik ho menoridade sira, tanba durante nee atinji ho volume 43%, maibe daudaun nee tun ona mai volume 35%, signifika moras refere nia kontaminasaun redus ona,” dehan Prezidente Autoridade Munisipiu Ermera (PAME), José Martinho do Santos Soares ba jornalista sira iha Kampo Alor, Dili, Tersa (21/01/2025).
Tuir nia, maneira atu kombate moras malnutrisaun mak tenke kreativu iha setor agrikola, oinsa bele diversifika produtu lokal sira ba komunidade hodi konsumu, no produtu lokal sira sai hanesan ai-haan diaria ba komunidade sira.
Tanba produtu importasaun neebe mak komunidade sira konsumu nee kontaminadu ho ai-haan neebe laiha nutrisaun diak ba komunidade no labarik sira nia saude, tanba nee esforsu nafatin hodi promove nafatin produtu lokal, atu komunidade bele konsumu hodi sai kondisaun saudavel.
Aleinde nee Diretor Nasional Seguransa Alimentar, Cesar José da Cruz afirma, Ministeriu Agrikultura ho Pekuaria, Peska no Floresta (MAPPF) liu husi Diresaun Nasional Seguransa Alimentar foti dadus husi munisipiu sira, oinsa prevene malnutrisaun iha Timor Leste.
“Ita atu halo prevensaun ba malnutrisaun ba labarik ho komunidade sira, nunee la bele hetan mal-nutrisaun, tanba nee ita servisu hamutuk ho ministeriu relavante sira atu haree asuntu sira nee, hodi hasae produsaun iha rai laran,” nia realsa.
Entretantu Visi Primeiru Ministru, Ministru Koordenadór Asuntu Sosiais, Ministru Dezenvolvimentu Rurál no Habitasaun Komunitária, (V-PM, MKAS, MDRHK), Mariano Assanami Sabino hatete, Timor Leste iha hahan nutritivu barak hanesan fehuk midar, talas, ai-farina, batar kairala, kumbili no seluk tan, maibe sosiedade mak seidauk iha konhesimentu atu konsumu ai-haan sira nee.
Tanba produtu lokal nutritivu barak, nunee presiza iha kampanha atu ema hotu iha konhesimentu ba konsumu ai-haan nutritivu ho diak.
(EST 1)
