DILI, STLTIMORLESTE.com – Atu evita susuk iha tempu udan, komunidade idak-idak presiza halo limpeza iha valeta no tau lixu iha fatin.
Dehan komunidade Rainaldo de Jesus husi Aldeia Likarapoma, Suku Bairo Pite, Postu Administrativu Dom Aleixo, Munisipiu Dili, bainhira halao hela limpeza, ba STL, Kuarta nee (01/01/2025).
“Ita hatene katak agora tempu udan ita idak-idak halo limpeza iha valeta neebe mak besik hela ita nia uma, oinsa tau lixu iha fatin no labele soe arbiru lixu, tanba moras dengue nee liu husi susuk neebe mak tata ita, ho ida nee bainhira ita atu evita moras ida nee mak ita tenke halo limpeza iha ita nian uma hun,” nia afirma.
Rainaldo hatutan, aleinde halo limpeza iha valeta, limpeza iha uma hun, kontrolu bazu aifunan, lata aat, bee nalihun, roda aat, buat sira nee mak kria susuk, tanba agora nee loraik udan hela deit halo susuk mos barak.
“Hili lixu neebe mak iha valeta tau iha fatin neebe mak ita prepara ona, udan hela deit nunee susuk mos barak, ita idak-idak mak tenke iha konsiensia hodi hamoos valeta, atu nunee evita susuk iha tempu udan,” katak nia.
(EST 1)
