DILI, STLTIMORLESTE.com – Sentru Saude Munisipiu Dili (SSMD), Mateus Pinto husu Autoridade lokal sira iha Suku Komoro no Suku Vila Verdi, atu kontrola komunidade sira neebe hela iha foho leten labele soe foer boot arbiru, tanba programa ALFA hahu implemnta ona.
“Autoridade tenke halo kontrola ba komunidade sira neebe hela iha foho leten hanesan iha Golgota, Kampung Baru nian nee, no Suku Vila Verdi, atu sira labele soe foer boot arbiru, tanba agora ita implementa ona programa ALFA, tanba nee husu Autoridade Lokal atu halo kontrola se lae hanesan deit, ita implementa tiha programa ALFA, maibe komunidade kontinua soe foer boot arbiru,” hatete Diretor Servisu Sentru Saude Munisipiu Dili (SSMD), Mateus Pinto ba jornalista sira ,iha nia knaar fatin, Kuarta (20/11/2024).
Nia dehan, Saude iha ema hotu nia liman rasik, tanba nee tenke harii sintina no labele soe foer boot arbiru.
Iha fatin hanesan, Xefe Suku Komoro, Eligio Jose da Silva Marçal informa, hanesan Autoridade lokal sei haruka Xefe Aldeia sira atu halo kontrolu.
“Ami sei halo kontrolu ba komunidade sira neebe hela iha foho leten, tanba nee hau sei fo atensaun ba xefe aldeia sira atu halo kontrolu ba komunidade sira iha foho leten, tanba ita hatene katak ita agora implementa ona programa ALFA, tanba neebe presiza halo kontrolu, se lae hanesan deit, ita implementa tiha programa ALFA maibe komunidade kontinua soe foer boot arbiru, ida senti ladun diak,” nia informa.
Nunee mos, Komunidade Maria dos Santos Banca deklara, komunidade Suku Komoro hotu-hotu iha sintina, no la soe foer arbiru, maibe husu ba Governu dada bee moos ba kada uma kain idak-idak atu nunee soe foer boot tenke uza, bee laiha hetan saude diak husi neebe.
(jen)
