DILI, STLTIMORLESTE.com – Governu liu husi Sekretariu Estadu Toponomia no Organizasaun Urbana (SEATOU) halao eviksaun ba komunidade sira nia rezidensia, too agora komunidade balu seidauk hetan indemnizasaun, tanba nee husu Governu atu hasai povu husi nia fatin ho dignu.
Tuir Komunidade iha Suku Bairo Pite, area Surikmas, Jacarias da Costa katak, programa Governu halo dezenvolvimentu hanesan nee komunidade agradese, maibe sente triste bainhira Governu rasik mai ho planu atu halo dezenvolvimentu maibe la kria kondisaun dignu ba nia povu rasik, liu-liu sobu komunidade nia uma, Governu rasik mos prontu selu komunidade nia sasan, hanesan uma ka ai-horis sira seluk neebe iha.
“Ami nafatin koopera ba politika dezenvolvimentu saida deit mak Governu halo iha Timor Leste, maibe ami husu katak Governu ida nee mos tenke trata ami komunidade sira ho dignu, labele hanoin deit mak mai sobu ami nia hela fatin, maibe haluhan atu lori ami ba neebe, husi preokupasaun sira nee mak ita husu atu hadia,” dehan Komunidade nee hafoin hatoo kestaun ba SEATOU, iha Surikmas Dili, Kuarta (22/01/2025).
Tanba realidade akontese iha publiku, komunidade vitima sira, liu-liu iha Komoro, Bidau Santa, too agora komunidade 197 seidauk hetan nia direitu ka indemnizasaun, nunee husu ba Governu liu husi Ministeriu Obras Publikas (MOP) atu haree, tanba saida too agora komunidade vitima sira barak mak seidauk selu sira nia direitu.
Entretantu Xefe Suku Bairo Pite, Joaninha Alves Soares afirma, hasai komunidade husi nia hela fatin, liu-liu planu Governu halo alargamentu estrada, prosesu hotu-hotu tenke trata komunidade ho dignu, liu-liu sobu sira barak laiha uma, tenke halo indemnizasaun ka selu ba sasan neebe hasai, nunee komunidade bele utiliza osan ka sasan ruma hodi harii fali uma foun.
Tanba Governu hasai ema husi nia fatin, laos inimigu ida, katak Governu tenke uza lei obrigatoriu, haree katak kondisaun mos koopera ona ho Governu, liu-liu SEATOU ho MOP hodi halo nia servisu, ezije nafatin katak hasai komunidade husi nia fatin nee fasil, maibe tenke hafasil liu tan mos indemnizasaun ba komunidade sira neebe konsidera sai vitima ba planu Governu ba dezenvolvimentu nasional.
Aleinde nee, Ministru husi Ministeriu Obras Publika (MOP), Samuel Marçal dehan, Governu prontu selu no halo indemnizasaun ba komunidade sira neebe hetan eviksaun ka lakon nia hela fatin, maibe tenke bazeia ba termu sertu hatudu provas katak rai nee privadu nian, no uma nain tenki hatudu sertifikasaun, hafoin loke bankaria, bainhira dokumentu hotu-hotu lao diak ona mak Governu foin selu.
Tanba nee indemnizasaun sei la lakon, tanba buat hotu bazeia ba lei, nunee prosesu nee sei la lakon, Governu prontu selu ba komunidade sira atu bele utiliza fali nesesidade seluk no harii fali uma mahon balu atu hela, no husu atu harii uma ho fatin neebe dignu, seguru, atu labele okupa espasu publiku.
(EST 1)
