MATEBIAN, STLTIMORLESTE.com – Komunidade sira iha Suku Laisorulai de Baixo husu Ministeriu Saude (MS) destaka kareta ambulansia iha Postu Administrativu Matebian, Munisipiu Baukau.
Komunidade Sebastião da Costa Belo hateten, atendimentu pesoal saude sira iha Postu Saude Laisorulai ba komunidade sira husi Suku lima iha Postu Administrativu Matebian durante nee lao efetivu tuir rekursu neebe eziste, maibe iha preokupasaun balun, tanba durante funsionamentu Postu Matebian too ohin loron Ministeriu Saude seidauk destaka kareta multi funsaun no ambulansia iha Matebian hodi translada pasiente kondisaun inan isin gravida husi uma ba fasilidade saude hetan tratamentu.
“Ami nia medika sira atendimentu diak, maibe problema mak inan isin rua transporte mak problema, Governu atensaun ba ami komunidade, ami husu mak ambulansia, tanba ami nia inan aman moras aperta susar mak transporte,” hateten Sebastião ba jornalista sira iha Matebian, Tersa nee (15/07/2025).
Nia sublina, durante nee inan isin rua no moras seluk neebe komunidade sira enfrenta sempre halo kontaktu ho Sentru Saude Kelikai hafoin apoiu kareta multi funsaun no ambulansia translada pasiente husi uma ba fasilidade saude neebe eziste.
Maibe bainhira kareta multi funsaun no ambulansia husi Sentru Saude Kelikai okupadu ho servisu seluk, obrigatoriu komunidade sira hulan komunidade neebe moras no aluga transporte publiku hafoin tula ba fasilidade saude hodi hetan tratamentu.
“Ida nee ami sente ameasa ba ami nia vida, tanba atu atende lalais ba fatin saude la too lalais tarde liu, tanba nee husu, ami Postu Administrativu ketak ona, se bele Governu haree aloka multi funsaun mai fatin refere,” Sebastião sujere.
Xefe Sentru Saude Kelikai, Domingos Boavida hateten, Administrativamente Postu Administrativu Kelikai fahe ona ba Postu Administrativu tolu kompostu Postu Matebian, Kelikai Antigu no Kelikai, maibe area saude seidauk fahe, tanba kontinua utiliza fasilidade hanesan kareta multi funsaun husi Sentru Saude Kelikai.
Nia rekonhese, Sentru Saude Kelikai daudaun iha kareta multi funsaun ida kobre postu tolu difikulta tebes iha prosesu translada pasiente bainhira iha postu tolu akontese kazu hanesan.
“Esforsu balun neebe ami halo, se karik kazu akontese iha postu tolu nee dala ida prezisa ambulansia nia atendimentu, entaun ami koordena ho familia pasiente bele tula ho transporte publiku ba fasilidade saude,” Domingos salienta.
Xefe Sentru Saude Kelikai argumentu, preokupasaun refere hatoo ona ba nasional no sei responde, maibe fazeadamente.
Entretantu Administrativamente Postu Matebian eziste ho Suku lima kompostu Suku Laisorulai de Baixo, Laisorulai de Cima, Lelalai, Abo no Maluru, neebe rejistu total populasaun liu rihun 8.
(tom)
