BAUKAU, STLTIMORLESTE.com – Komunidade sira iha Suku Kaibada Makasae, Postu Administrativu Baukau Vila, Munisipiu Baukau, preokupa ho paixon nia barulhu ka tarutu, tanba perturba ema seluk nia tempu deskansa.
Komunidade Aldeia Data-Ua, Agostinho Ximenes informa, paixon no fujetis lo-loos utiliza iha selebra loron Natal no tinan foun, maibe seidauk too selebrasaun Natal no tinan foun, maibe paixon iha suku Kaibada Makasae hahu barulhu, tanba envolve husi labarik kiik sira.
“Ida nee mos ami preokupa duni tanba sunu mina rai ho lata sira nee komesa halo barulhu kalan dukur, atu deskansa mos la diak hotu entaun ami husu seguransa prevene buat sira nee para ema deskansa karik, deskansa ho vontade,” Agostinho informa ba jornalista sira, iha Data-Ua, Kuarta (26/11/2025).
Nia konsidera, asaun sunu paixon prejudika ba labarik sira, tanba paixon refere utiliza produtu gazolina neebe iha risku, tanba bainhira deskuidu ruma ahi bele han labarik utilizador sira.
Nunee husu ba Autoridade Seguransa no Suku atu kontrola ba asaun sunu paixon iha Suku refere, hodi evita barulhu fo livre ba ema seluk nia deskansa.
Hatan ba kestaun nee, Xefe Suku Kaibada Makasae, Julio Alegria Belo hateten, parte Suku simu ona orientasaun husi Autoridade Sivil no Seguransa iha Munisipiu Baukau atu kontrola paixon nia barulhu iha nivel Suku, tanba perturba ema seluk nia deskansa no fo risku perigu ba utilizador sira, nunee inisiu loron 12 Novembru 2025 too ohin loron parte Autoridade Suku kontrola paixon nia barolliu konsege priende ona paixon balu husi utilizador sira.
“Iha nee ami priende tiha para labele tiru, tanba iha parte balu ema ida hakarak hakmatek iha parte balu sira hakarak tiru para gostu, maibe la hatene katak buat nee perigu ba sira nia aan, tanba paixon nee uza gazolina, ita sunu mak tarutu nee diak ona mais tau dala rua dala tolu mak la tarutu rebenta nee perigu ba ita nia vida,” Alegria katak.
Entretantu inisiu loron 12 Novembru 2025 too ohin loron, parte Suku priende ona paixon husi labarik utilizador sira besik ona unidade 10.
Jornalista: Tomas Reis
Editora: Carme Ximenes
