BAUKAU, STLTIMORLESTE.com – Komunidade Postu Kelikai Antigu husu Governu tau atensaun ba kondisaun estrada ligasaun husi Postu Administrativu Laga ba Kelikai Antigu, tanba daudaun nee kondisaun grave.
Habitante Kelikai Antigu Francisco Urbanu Moreira hateten, estrada mak fator importante atu determina no dezenvolve setor sira seluk iha rai laran, liu liu iha Postu Kelikai Antigu, maibe konsdisaun estrada diresaun husi area Dailari Postu Administrativu Laga, too iha Postu Kelikai Antigu, dadaun nee kondisaun aat neebe iha tempu udan difikulta movimentu transporte publiku sira tula komunidade asesu merkadoria iha nivel Munisipiu.
“Ami povu Kelikai Antigu agradese ba Governu tanba estabelese ona Postu Kelikai Antigu, maibe ami rekomenda liu-liu estrada mak fator primeiru fasilita ami nia movimentasaun,” rekomendasaun nee hatoo husi habitante Kelikai Antigu Francisco Urbanu Moreira ba jornalista STL iha Suku Gurusa Postu Kelikai Antigu, Domingu (29/06/2025).
Administrador Postu Kelikai Antigu, Francisco Matias Gusmão “Junior” akresenra, Postu Administrativu Kelikai ofisialmente estabelese ona no konsidera estrada diresaun husi Postu Laga too iha Kelikai Antigu no kontinua too iha Postu Kelikai nee kategoria estrada Munisipal, maibe daudaun konsdisaun grave, tanba nee prezisa Autoridade Munisipal halo koordenasaun ho Ministeriu Obras Publikas haree asuntu refere hodi solusiona.
“Liu-liu estrada preokupasaun ba povu, ita nia povu nee mos povu Timor Leste no sira mos prezisa asesu no goza ba dezenvolvimentu hanesan mos Postu Administrativu seluk,” hateten Junior.
Prezidente Autoridade Munisipiu Baukau, Veneranda Lemos rekoinhese kondisaun estrada husi Postu Administrativu Laga ba Kelikai Antigu, tanba daudaun kondisaun estrada aat, maibe daudaun iha faze levantamentu dadus.
“Estrada aat loos duni, maibe tinan ida nee depois de levantamentu de dadus foti hotu hatutan ba Nasional book lalais estrada, laos deit estrada, maibe infraestruturas bazika neebe povu presiza,” katak Venerada.
Entretantu observasaun STL nian iha terenu nota katak, reabilitasaun estrada husi Postu Administrativu Laga daudaun nee implementa liu husi projetu estrada rural neebe fahe ba pakote rua, pakote inisiu hamutuk kilometru (Km) 2.300 metrus husi estrada nasional diresaun Baukau-Lautem area Dailari too Alemilari Suku Tekinomata, Postu Laga responsabiliza husi kompanhia lokal Rozi Construction Lda ho valor orsamentu US$ 523,603.89 progresu fiziku akumuladu too fulan Maiu nee foin atinji 66.96%, pakote daruak kontinuasaun husi area Alemilari too area Samaguia Rabikolaliu Km 2 resin responsabiliza husi kompanhia Nautetu Fatima Unip Lda ho valor orsamentu US$ 436,794.48 progresu fiziku akumuladu too fulan Maiu nee foin 26.02%.
Enkuantu husi area Samaguia Rabikolaliu too iha semiteriu publiku Suku Afasa, seidauk hetan reabilitasaun, tanba nee iha tempu udan difikulta mobilizasaun transporte publiku no privadu sira.
Maibe husi area semiteriu publiku Afasa too iha Suku Uaitame nee mos hetan ona reabilitasaun iha neebe dadaun kontinua iha faze implementasaun husi kompanhia lokal haat ba distansia Km 12 fahe ba pakote haat.
Pakote primeiru responsabiliza husi Kompanhia Flores Unipesoal Lda ba Km 3 ho valor orsamentu US$ 510,231.96 progresu fiziku akumuladu too fulan Maiu nee 70.11%, pakote segundu responsabiliza husi kompanhia Helcia Unipessoal Lda ho valor US$ 619,654.00 fiziku 64,46%.
Pakote terseiru responsabiliza husi kompanhia DVP Construction Unipesoal Lda ho valor US$ 588,618.90 fiziku 80,25% no pakote ikus liu responsabiliza husi kompanhia Lialura Unipesoal Lda ho valor US$ 535,826.40 neebe progresu fiziku akumuladu too fulan Maiu nee foin atinji 29.12%.
(tom)
